КОЦУР – Чежка ситуация виволана зоз вельким огньом хтори залапел ширше подруче Делиблатскей писковини ище вше тирва, а до помоци ше уключовали и вецей огньогасни екипи зоз наших местох. Свойо доприношенє дали и члени Добродзечного огньогасного дружтва зоз Коцура.
По словох командира Саши Тодича, зоз Огньогасного союзу Сербиї сцигол допис у котрим було назначене же помоц на Делиблатскей писковини потребна и хто у можлївосци най ше одвола. Пейцме члени ДОД Коцур ше такой явели и порихтани були рушиц на драгу – окрем командира Тодича, ту були Здравко Радович, Дарко Планкош, Александар Караґача и Роберт Бенце.
На Делиблатскей писковини препровадзели два днї, а задаток им бул чувац Штаб и викендицу дзе дзеци ходзели на вилєти, гашиц огень и мерковац же би ше нє преширел. По словох Тодича, ситуация на терену озбильна и чежка, а коцурски огньогасци свой задаток сполєнли найлєпше як могли.
Члени ДОД Коцур на Делиблатску писковину пошли зоз власним автом, огньогасни камион остал у валалє за случай же ше дацо случи и же будзе потреби гашиц огень.
З оглядом на хвилю и вельки горучави, командир ДОД Коцур Саша Тодич апеловал на людзох нє палїц нїч анї по дворох, анї на отвореним, нє руцац ґибаки з превозки у рушаню, а у потреби обовязно волац 193.