СЕРБИЯ – Влада Сербиї, 27. авґуста, принєсла уредбу зоз хтору ше ушорює статус електричних превозкох зоз двома колєсами, педалами и шедзиском. Нови правила ше одноша на превозки хтори випродуковани, або увежени и склопени у фабрики у Сербиї найпознєйше по 27. юний 2026. року, за хтори пред тим нє була утвердзена одвитуюца катеґория.
То, медзитим, нє значи же ше кажду електричнуа бициґлу будзе мушиц реґистровац.
Власнїки превозкох на хторих ше уредба одноши буду мушиц придац вимогу за утвердзованє технїчних характеристикох. Медзи иншим, будзе ше преверйовац моц електромотора, найвекша конструктивна швидкосц, маса, марка и модел превозки.
На основи тих податкох будзе утвердзене чи превозка бициґла, мопед або моторка. Кед сполнює условия за бициґлу, нє муши ше ю реґистровац як мопед або моторка, а власнїк достанє одвитуюцу налїпку. З другого боку, кед ше утвердзи же слово о мопеду або моторки, превозка будзе мушиц прейсц технїчни препатрунок и будзе ше ю мушиц реґистровац.
Вимоги за утвердзованє технїчних характеристикох треба придац найпознєйше по 1. фебруар 2027. року, а час за упис до Єдинственого реґистру превозкох за тоти превозки хтори муша буц реґистровани будзе по 1. марец 2027. року.