НОВИ САД – Покраїнска влада видвоєла вецей як 27 милиони динари за Ґимназию Жарко Зренянин у Вербаше и Општину Бач.
Зоз 16,4 милиони динари будзе финансовац набавку опреми за Ґимназию Жарко Зренянин у Вербаше, хтора єдна з трох найстарших школох у Сербиї, пише у сообщеню Покраїнскей влади.
Средства буду вихасновани за опреманє учальньох, преблєкальньох и лабораторийох, и за рахункарску опрему, же би ше унапредзело условия за роботу и пребуванє школярох и занятих.
Општини Бач ше унапрями 10,75 милиони динари за финансованє проєкту вибудови канализацийней мрежи у населєньох Вайска и Бодяни.
З тима укладанями Покраїнска влада предлужує потримовац злєпшанє условийох за образованє и розвой школскей инфраструктури и модернизацию комуналней инфраструктури у локалних самоуправох у АП Войводини.