СИВЕЦ – Шицки штири представи хтори того року участвовали на 70. Општинскей смотри театралней творчосци „Велимир Сандич Велько” у Сивцу, пласовали ше на дальше змаганє – на Зонску смотру.
Општинска смотра закончена внєдзелю, 27. марца, а того року є отримана у дньох двох викендох, понеже участвовали штири представи и селектор Смотри Давид Кецман зоз Зомбора одлучел же ше шицки пласовали на Зонску смотру.
Зонска смотра у Червинки будзе од 2. по 7. април и з кулскей општини на на нєй буду участвовац представи „Дзивка з трома оцами” Брану Црнчевича, у режиї Максима Мудринича, а у продукциї сивецкого Дому култури; „Чудо у Шарґанє” Любомира Симовича, у режиї Радоя Чупича Дому култури Червинка, Сезона лову на ловара” Олександра Витера, у режиї Владимира Надя Ачима Младежскей ґрупи Драмского студия „АРТ” рускокерестурского Дому култури и „Подозрива особа” Бранислава Нушича, у режиї Драґана Остоїча Културного центру Кула.
Попри представох з кулскей, на Зонскей смотри ше будзе змагац и єдна театрална представа з вербаскей општини, а як госци наступя драмски аматере з Убу.