РУСКИ КЕРЕСТУР – Прилапйованє других таки яки су, толеранция и вира, були теми о хторих ше бешедовало на трибини за младих, хтора всоботу, 7. фебруара вечар отримана у просторийох керестурского Каритасу. Инспирация теми було виреченє зоз Святого писма „Примайце єдни других як вас Христос приял на славу Божу“.
Госц на стретнуцу бул писатель Микола Шанта, котри младим бешедовал о особним искустве по питаню вири, алє давал и приклади зоз живота своїх приятельох котри аж у чежких часох спознали виру до Бога.
На трибини були млади, углавним школяре основней и штреднїх школох, котри и сами дакеди подозриви до постояня Бога, та поставяли питаня о смислу вири. У музичней часци наступели Кристина Афич и Марина Роман.
По словох координатора керестурского Каритасу Янка Катону, таки трибини плановане отримовац кажди други викенд у мешацу, а госц вше будзе друга особа.
