ПРЕШОВ (СЛОВАЦКА) – Як информує Театер Александра Духновича (ТАД) з Прешова, а преноши lem.fm, визначни ґлумец того єдиного правого професийного русинского театру Василь Русиняк 7. септембра номиновани за Награду „ДЕСКА” словацкей Асоцияциї сучасного театру, а на основи резултатох гласаня театралних критичарох и публицистох.
За тоту престижну награду у єдней театралней сезони на уровню цалей Словацкей конкурую професийни ґлумци и други креативни уметнїки з обласци театру, а Русиняк медзи трома номинованима ґлумцами. За Награду „ДЕСКА” у сезони 2015/16. Василь Русиняк конкурує з улогу „Венечки” у представи „Москва – Петушки” Венедикта Єврофеєва, а у режиї Светозара Спрушаньския.
Шветочне преглашенє добитнїкох Награди будзе 18. септембра у Словацким народним театре у Братислави, а Награда запровадзена 1996. року и перши раз є додзелєна под час Медзинародного театралного фестивалу „Театрална Нїтра”.
Ґлумец ТАД Василь Русиняк (1953), родом Прешовчань, студиї ґлуми закончел на Києвским националним универзитету Карпенка-Карого. Такой по студийох постал член прешовского театру, теди з меном Українски народни театер (од 1990. року ТАД), у хторим витворел велї значни и паметлїви, векшином главни улоги, а хтори видзела и наша публика.