Майстор Звонимир уж двацец роки роби як тапетар, алє и мурує, справи шицко цо надума, скрава, шиє, плата, а гвари же потребна лєм сцелосц. Так тей жими сам направел брикети и надосц зашпоровал, а помоц у його фамелиї приклад як вєдно мож лєпше ґаздовац.
Тота жима була моцна, а Дюрдьовчань майстор Звонимир Мудри находзи вигодни ришеня за зогриванє и додатни заробок. Математика му була єдноставна и шицким позната. Зогриванє барз драге, а одруцени папер и конари з древох мож вихасновац. Прето на интеренту поглєдал ришенє и уж другу жиму хаснує резачку за конари котру сам справел. Так зашпоровал заробок за даскельо мешаци, место же би мал трошок за зогриванє.
МАЛО УЛОЖЕЛ, А ВЕЛЬО ДОСТАЛ
– Два жими ше греєме задармо, потрошим лєм струю за шечканє конарох и гориво же бим привезол конари. Шекач сом прилагодзел ґу своїм потребом. У дутянох єст купиц рижни резачки, алє вони режу як пилка и правя пильовину, а моя шечка на пейц центиметри и практичнєйша є – гварел Звонимир.
Вєшенї направел и машину за щипанє, з котру по потреби щипа древа у валалє. И за ню купел лєм гевти часци котри нє мож сам направиц, як цо вельки фуров и мотор. Роби на монофазну струю, а уложел коло двасто евра, як и за шекач. Дзекуюци тому, шекеру вельо менєй хаснує, та древа лєгчейше и швидше порихта за топенє.
У валалє ше швидко пречуло же направел щипач, та Дюрдьовчанє одходза до ньго по совит, а и нє раз го пожичовал же би го пробовали сами хасновац, або направиц, алє ше шицки швидко оддумаю од тей идеї.
По майстрових словох, на интернету мож вельо того найсц и прето тей жими надумал з паперу и пильовини правиц брикети. За тото справел и машину за дранє паперу, же би його жена и дзеци то нє мушели робиц. Брикети котри прави маю 30 одсто пильовини, а 70 одсто на дробнєйше шечканого паперу и води. Часци миша з вартачку на котрей предлуженє за мишанє фарби. Мишанїну ше суши у фурми у котрей ше пред тим висциска звишок води.
Указало ше же брикет дава векшу температуру кед на стредку ма дзиру през цалу длужину, та Звонимир таку фурму направел. Гвари же тоти його нє можу заменїц куповни брикети, алє потераз му заменєли коло два метери древа за зогриванє тей жими.
„КРАДНУЛ” РЕМЕСЛО
Перши три роки стажу Звонимир Мудри здобул у Петроварадину, дзе з майстром правел прикраски за ташни, а потим робел у єдней новосадскей фирми дзе, як гварел, „краднул” ремесло, учел ше шиц, буц тапетар, та достал интерну квалификацию за тоту роботу. По конєц роботного стажу у тей фирми робел тапетарски роботи, а вец предлужел робиц дома. Перши його продукт були папучи за хижу.
– Сам сом ше научел тапацировац мебель, патрел сом як го мож розложиц, а вец сом водзел рахунка так го и составиц. Найлєпше чувство то кед муштерия задовольна з тим цо сом поробел – гварел Звонимир Мудри.
Потераз тапацирал мебель, сепареи и карсцелї за ресторани и кафичи, дзвери и авта з нука. Роби з меблом, штофом и еко скору, котру нє вше препоручує, бо ше швидко счуха, та опука и розпаре.
Найвекше виволанє му було тапациранє угловей ґарнитури од тисяч евра. Кед ю розобрал, поволал власнїка же би видзел зоз чого є составена.
– Випатрала як же є порихтана за депонию. Нє була составена з дещищкох, алє окрайкох, на котрих була и скорка древа, а у даєдних часцох под платном були положени дзецински маїци, же би тримали форму. З муштерию сом вше щири, сцем им повесц яки стан, посовитовац их и крашнє ше порадзиц о нашим сотруднїцтве. Кед ми ше видзи же сом дацо нє годзен поробиц, волїм одбиц як поробиц так як нє треба, бо ми важне же би муштерия була задовольна – потолковал Мудри.
Особи котри з нїм сотрудзовали описую го як педантного и коректного майстра. Каждого посовитує и потолкує прецо дацо добре або нє, чи слово о фарби штофа, або його отримованю. Окремну увагу пошвецує квалитету и випатрунку продуктох, же би цо длужей тирвали. Наприклад, „муницию” од хефталици после його тапацираня нїґдзе нє видно, бо вше водзи рахунка же би ю добре закрил.
Було и таких цо од нього вимагали же би нашвидко витапацирал мебель, бо тей особи нє було важне же би бул красни на око. Таку роботу вше одбива. Сце ше пошвециц свойому продукту тельо кельо потребне, а подлу рекламу му нє треба. Точнєйше, о його роботи бешедую лєм муштериї, бо ше нїґда сам нє рекламовал. До такей промоциї єдино и вери.
– Нїґдзе сом нє оглашовал же тапацирам, а роботи мам. Найволїм так, кед ме дахто препоручи, кед дахто ма довирия до мнє, бо видзел мою роботу, а нє виписану рекламу – потвердзел Звонимир.
СТАРЕ МОЖЕ БУЦ ЛЄПШЕ ЯК НОВЕ
Вельо раз и себе, и свойо муштериї прешвечел же лєпше претапацирац стари мебель, як купиц нови.
– Пре гиперпродукцию, вецей ше нє дава уваги на квалитет. Древо ище анї нє висушене як треба, а з нього уж направени кавч, або орман. Таки направени при пецу, страци першобутну форму. И таки сом оправял и тапацирал. Стари и очувани мебель барз велька чкода руциц. Вельо раз сом бул присутни кед людзе побановали же одруцели стари мебель, а купели нови. Єст купиц и тераз квалитетне, алє лєм час укаже же яке є, нє його цена – посовитовал Мудри.
Найвекшу потримовку ма од супруги Ясмини, котра му вше помага, як и син Неманя и дзивка Єлена. Вони углавним розклопя мебель, а то му барз вельо значи, бо сам розклапя вельо длужей. Гоч є нє шнайдер, за свойо потреби шиє шмати за роботу, панталони з гамовами и якни, зошил и якну з еко скори, а дзивки платняну ташку.
Скора чежша за обробок, алє нєдавно за танєчнїкох з виводзацкей ґрупи дюрдьовского КУД „Тарас Шевченко”, дзе танцує и його син, зошил скоряни ременї. Гвари же кед видзи крой и кед ма апарати за тоту роботу, вец му нє проблем нїч зошиц.
– Дакеди зме на пияцу предавали папучи, алє ше нє виплаци. Репроматериял, млєта шпунджия драга, як и платно, нїч од того нєт купиц у валалє, та одход по тото трошок. Док заплацим место на пияцу и гориво, чежко вицагнуц заробок – вираховал Звонимир.
Папучи вон шиє за двасто динари, тапациранє кавча кошта штерацец евра, угловей ґарнитури од сто двацец по сто пейдзешат евра, а по потреби шиє и заглавчки.
Знука тапацирал автобуси и авта, медзи котрима и олдтаймери, стари модел „кадета” з Австриї, „джип” Вилис и два „фиати 750” – єден тапацирал по фабричним випатрунку, а други з червену и билу еко скору, бо власнїк страсни симпатизер „Червеней гвизди”. Муштериї му приходза з околних валалох, алє и з Беоґраду, Нового Саду и иножемства. Совити давал и Дюрдьовчаном у Нємецкей.
– Пред даскельома роками на телефон ме волал дохтор Баран з Нємецкей. Жадал же бим му витапацирал дзвери. Медзитим, кед зме ше зочели з тим же их на гранїци можу розпарац же би преверели чи дацо єст нука, и же мойо путованє там и назад може тирвац длужей як сама робота, одлучел сом подробно го поинформовац як их може сам витапацирац – виприповедал Мудри, котри дзечнє дава совити.
ДАЦО ОДРУЦАМЕ, А МОЖЕ ПОХАСНОВАЦ
– Вельо того одруцуєме, цо нам може буц од велького хасну – заключел майстор Звонимир Мудри. Дзекуюци идейом и вредним руком, направел шекач и щипач за древо, тей моцней жими и брикети з одрутних материялох, алє и у фамелиярним дворе направел древени лєтнїковец, хижку за пса, вимуровал роштиль, зошил ташку, якну и шмати за роботу – а за шицко тото дахто потроши нє мали пенєж.
