КУЛА – На Дванастим Фестивалє войводянскей тамбури за школярох з 10 основних и штреднїх школох з Войводини, хтори 12. марца отримани у Школи за основне музичне образованє (ШОМО) у Кули, медзи найлєпшима и школяре з тей Школи.
У катеґориї солистох медзи 49 школярами змагали ше и штверо з кулскей ШОМО, и шицки завжали перши места, понеже достали вецей як 90 боди.
З керестурского Оддзелєня перши места освоєли Иґор Папуґа, друга класа на прим- тамбури и Матей Катрина, треца класа на бас-прим тамбури, котри школяре наставнїка Милана Суїча, а з Кули Марко Алексич на прим и Дияна Чуде на бас-прим тамбури, обидвойо школяре штвартей класи при наставнїкови Владимирови Медєшови.
Змаганє закончене зоз Шветочним концертом у Велькей сали Културного центру Кула, дзе першенство наступу мали найлєпши змагателє з других школох, як и найлєпши камерни состави и оркестри.
Припознаня и награди найуспишнєйшим на концерту придала директорка ШОМО Лїляна Барна Никитович, а специялну награду – нову тамбуру-прим, хтору за тоту нагоду виробел наставнїк домашнєй Школи Милан Суїч, достал Марко Парчелич, школяр штвартей класи Штреднєй музичней школи зоз Суботици.
