РУСКИ КЕРЕСТУР – На керестурским теметове вчера на поладнє квеце на гроби Дюру Папгаргая, Владимира Бесерминя, о. Михаила Мудрия и Якима Сивча положели представителє Дружтва за руски язик, литературу и културу з Нового Саду и Секциї Дружтва у Руским Керестуре.
Гроб писателя Дюру Папгаргая (1936-2008) нащивени з нагоди седмей рочнїци його шмерци, а з тей нагоди Ирина Папуґа пречитала Папгаргайову писню „Жовта причасц”, а Гелена Гафич Стойков свою писню „Мой валал”.
Члени Дружтва квеце положели и на гроб пред роком упокоєного писателя и професора у керестурскей Ґимназиї Владимира Бесерминя (1946-2014), котри ше упокоєл 20. марца, а Гафич Стойковова му на чесц пречитала свойо стихи „Витор”.
Члени Дружтва вчера тиж нащивели и гроби пароха керестурского о. Михаила Мудрия (1874-1936), чия 140-рочнїца народзеня означена у децембре 2014. року, а тиж и композитора и педаґоґа Якима Сивча (1935-1989), чию ше 80-рочнїцу народзеня означує у тим, 2015. року.
