РУСКИ КЕРЕСТУР – У парохиї св. оца Миколая 39-еро школяре другей класи вчера першираз приступели до св. Тайни Причасци, у Катедралней церкви на дзецинскей Служби Божей на 11,30, а дзень пред тим и до св. Споведзи.
Службу Божу на нєдзелю Пресвятей Евхаристиї служели шицки троме домашнї священїки – парох о. Михайло Малацко и капеланє о. Владимир Медєши и о. Михайло Шанта, а церква була полна з фамелиями и родзину першопричашнїкох.
Парох о. Малацко у казанї потолковал же св. Причасц то вираз Божей любови ґу нам и нашей любови ґу Богу кед го примаме у св. Еухаристиї под видами хлєба и вина.
На концу Служби першопричашнїки присутним пририхтали кратку програму, а потим участвовали у процесиї коло церкви зоз св. Тайнами, а з першопричашнїками и други дзивчатка руцали ружово лїсточка опрез священїка хтори ношел св. Чашу.
Кед закончена процесия, парох у церкви шицким першопричашнїком подзелєл памятни обращики на тоту значну подїю за їх духовни живот. За шицко их пририхтали шестри Служебнїци, а виронауку им тримала ш. Авґустина.
Векшина ходзели и на школску виронауку ґу вироучительки Златици Малацко, а попри нєй на шветочносци першей Причасци були и їх учительки Любка Бучко и Ясминка Сабадош.