НОВИ САД – У полней церкви св. апостолох Петра и Павла, Новосадянє вчера преславели Квитну нєдзелю на Служби Божей хтору служел парох о. Юлиян Рац, а после Богослуженя шицки вирни достали багнїтки хтори однєсли до своїх обисцох.
У казанї, парох надпомнул же нас тото швето мотивує же бизме дошлїдно жили як прави християнє.
– Треба ше потрудзиц жиц по прикладзе Исуса Христа и у согласносци з волю Божу. Покайме ше и меркуйме же бизме нє гришели и нє уквильовали других. Нє будзме як тоти котри преславйовали Исуса кед уходзел до Єрусалиму, а нєодлуго потим кричали „Розпнї го!” – гварел о. Рац.
На Благовищенє, на ютре, 7. априла, у Новим Садзе Служби Божо буду на 10 и на 18 годзин.
