ҐЛОЖАН – Фодбалски клуби у Подручней фодбалскей лиґи Зомбор внєдзелю, 5. марца у Ґложану, предужели свою ярню часц сезони, кед Русин одбевал нєришено 1:1 процив домашнєй Будучносци. Ґол за Русин дал Янко Кулич.
У першим полчасу домашнї водзели бависко и нє допущовали русиновцом формовац нїяки напад. Перши ґол посцигнути аж у 31. минути, кед Янко Кулич зоз чежкей позициї добре заквачел лабду и послал ю просто до мрежи. Нажаль, уж после седем минутох, пре нєпорозуменє медзи бавячами нашей охрани, домашнї зоз сто-одстотней шанси виєдначую резултат.
Пре досц подле судзенє було надосц спорни ситуациї, а пришло и до тензиї на терену о чим шведоча и 5 жовти картони з Русинового боку.
Змаганє закончене зоз резултатом 1:1, а пре жовти картони, у шлїдуюцим колу, тренер Саянкович нє годзен раховац на Владана Вуйовича.
За Русин бавели – Деян Кронич, Стефан Тома, Александар Кочиш, Владан Вуйович, Деян Чернок, Филип Вуйович, Боян Голик, Янко Кулич, Оґнєн Маркович, Матей Саянкович, Андрей Малацко, Милош Буквич и Никола Циврич.
Шлїдуюце стретнуце русиновци одбавя на соботу 11. марца у Новей Ґайдобри, процив екипи Соко.