КОЦУР – Тогорочни традицийни Крачунски концерт Културно-уметнїцкого дружтва „Жатва” отримани вчера вечар, 8. януара, у Велькей сали Дома култури у Коцуре.
Вечарши концерт зоз шпиванками отворел Церковни хор Грекокатолїцкей церкви Успения Пресвятей Богородици хтори пририхтала Єлена Алексич. Потим ше зоз драмску сличку представели виронаучни дзеци, хтори за тоту нагоду порихтала вироучителька Ксения Бесерминї.
У шлїдуюцим блоку публика уживала у шпиванкох Дзецинскей шпивацкей ґрупи КУД „Жатва” у провадзеню гармоникаша Любомира Сакача Андрия. Руководителє тей шпивацкей ґрупи Александар и Еуфемия Планкош, а координатор Марко Буила. Концерт збогацели и госци зоз РКЦ з Нового Саду, Виводзацка фолклорна ґрупа котра з тей нагоди одтанцовала танєц, а порихтал их Владимир Иван Вева
Шлїдзели танци Старшей фолклорней ґрупи КУД „Жатва” котрих порихтали Александра Горняк и Микола Ґайдош, як и танци Виводзацкей ґрупи зоз КУД „Завичайне врело” кореоґрафа Николи Павловича. Конєц Крачунского концерту означели танци младших и старших фолклорашох, домашнїх аматерох зоз КУД „Жатва”.
Концерт з нагоди Рождества Исуса Христа аматере зоз коцурскей „Жатви” традицийно уж роками орґанизую. И того року члени Дружтва, на чолє зоз предсидательку Меланию Мали, Крачунски концерт орґанизовали же би своїм согражданом прикрашели чечуци крачунски швета.
Програма Крачунского концерту того вечара, котру водзела Настася Сакач, облапяла крачунски змисти, а шицки учашнїки ше представели зоз колядами и крачунскима винчованками, як и з писнями и рижнима танцами.