РУСКИ КЕРЕСТУР – После вечаршей Служби Божей пондзелок 29. децембра почало цалоноцне бдиниє пред Святима Тайнами у керестурским Старим манастире на Капущаним шоре.
Вирни ше модлєли и благодарели за рижни особни намиреня котри були записани през рок у окременей теки, а бдиниє було вязане и за модлєнє за потреби у новим 2026. року.
Славко Ройко, инициятор бдиния ше зоз шестрами Служебнїцами потрудзел же би цалу ноц присутни мали можлївосц вєдно ше модлїц, алє и за особну молитву и медитацию. През цалу ноц у Каплїчки було людзох хтори ше модлєли, окреме треба визначиц же було вельо младих, малженски пари хтори ше у цихосци модлєли.
У заєднїцкей молитви вимодлєни шицки 4 таїнства Ружанцу, медитациї читал Александар Планкош, млади мали свойо молитви, шпивало ше коляди и други писнї, часци зоз Вечурнї. У єдней часци бул присутни и парох о. Владислав Варґа и о. Михайло Шанта, на 6 годзин рано о. Варґа одложел св. Тайни, а ранша Служба Божа була служена у церкви.
