РУСКИ КЕРЕСТУР – Актуалному зволаню Совиту Месней заєднїци Руски Керестур, односно його членом, штварток, 23. юлия 2026. року, вишол штирирочни мандат понеже конститутивна схадзка отримана 23. юлия 2022. року, потим як 3. юлия 2022. року отримани остатнї виберанки за членох Совиту МЗ.
Як стої у Закону о локалней самоуправи, виберанки за членох Совиту треба же би були розписани найпознєйше 30 днї скорей вицеку мандата членох Совиту. Од дня розписованя виберанкох по дзень отримованя виберанкох нє шме прейсц вецей як 45 днї.
На сайту Општини Кула, як анї на огласней табли опрез Месней заєднїци, нє мож найсц нїяки информациї о розписованю виберанкох. Виберанки за Совит МЗ Руски Керестур розписує предсидатель Скупштини општини Кула Велибор Милоїчич, медзитим анї вон, анї секретар СО Кула Милорад Вуксан, та анї предсидателька Општини Кула др Весна Томич нє одвитовали на нашо питаня котри зме им урядово доставели по мейлу.
Най здогаднєме, на виберанкох за членох Совиту Месней заєднїци Руски Керестур 3. юлия 2022. року участвовали 11 особи, кельо и чишлї Совит, и то: Владимир Олеяр, хтори окончовал функцию предсидателя Совиту, потим на його место вибрани Звонко Рац, а потим тоту функцию превжала Илона Зарубица, як и члени Тихомир Медич, Сани Колошняї, Славко Бучко, Дюра Сабадош, Єлена Сивч, Биляна Ковачевич, Владимир Чизмар и Марина Преґун.