НОВИ САД – XXII Фестивал малих сценских формох „Дюра Папгаргаї” почнє 6. децембра на 18 годзин у РКЦ у Новим Садзе, з виставу малюнкох.
Такой по отвераню вистави, на 19 годзин, будзе проєктована на видео биму дзецинска представа „Мацерово шерцо” котру написала Ирина Гарди Ковачевич, ґлуми Емил Няради, а режирал ю Владимир Надь Ачим, у продукциї РНТ „Петро Ризнич Дядя” з Руского Керестура.
Друга представа того вечара будзе представа за одроснутих „Сон шмишного чловека” Фйодора Михайловича Достоєвского, у котрей ґлуми Мирослав Малацко, а режирал ю Владимир Надь Ачим, тиж у продукциї драмского ансамбла Дома култури Руски Керестур. Представа почина на 20:30 годзин.
На соботу, 7. децембра, на 19 годзин будзе вечар стендап комедиї кед наступя Душан Ковачевич, Стефан Вилимонович, Дьордє Пеїн, Ненад Барич и Деян Раїч. Режисер тей програми Славко Винаї, а продукцию подписує Драмски студио „Звонимир Павлович” РКЦ.
Тогорочни Фестивал финансийно помогли Секретарият за културу, явне информованє и одношеня зоз вирскима заєднїцами АП Войводини, Город Нови Сад, Городска управа за културу, Завод за културу войводянских Руснацох, Национални совит рускей националней меншини у Рeпублики Сербиї.
