НОВИ САД – XXII Фестивал малих сценских формох „Дюра Папгаргаї” почал 6. децембра у Руским културним центре (РКЦ) у Новим Садзе.
Нєшка, 7. децембра, на 19 годзин будзе вечар стендап комедиї кед наступя Душан Ковачевич, Стефан Вилимонович, Дьордє Пеїн, Ненад Барич и Деян Раїч. Режисер тей програми Славко Винаї, а продукцию подписує Драмски студио „Звонимир Павлович” РКЦ.
Вчера, 6. децембра, отворена вистава зоз XIX Подобовей колониї „Стретнуце у Боднарова – Ґосподїнци 2023” и приказани два монодрами: представа за дзеци „Мацерово шерцо” и представа за одроснутих „Сон шмишного чловека”.
Спред орґанизатора, а то Матка – Дружтво Руснацох Нового Саду – Войводини виставу и Фестивал отворел Борислав Сакач. Вон привитал присутних и потолковал же понеже ґлумци нє могли присц плановани представи проєктовани прейґ видео биму.
Владимир Салонски подзековал домашнїм же вистава орґанизована и у Новим Садзе, а на вистави роботи зоз прешлорочней Подобовей колониї „Стретнуце у Боднарова – Ґосподїнци 2023”, хтори робени у рижних технїкох и на рижни теми.
Вечар предлужени зоз дзецинску представу „Мацерово шерцо” хтору написала Ирина Гарди Ковачевич и з тей нагоди вона гварела же творчосц єдна з другей виходзи же вона сказки написала, а вец други дїяче ожили тото, а знїмателє на телевизиї приказали и же уметносц вше найдзе способи як будзе жиц вецей животи. У представи ґлуми Емил Няради, а режирал ю Владимир Надь Ачим, у продукциї РНТ „Петро Ризнич Дядя” з Руского Керестура.
Друга приказана представа того вечара була „Сон шмишного чловека” Фйодора Михайловича Достоєвского, ґлуми Мирослав Малацко, а режирал ю Владимир Надь Ачим, тиж у продукциї драмского ансамбла Дома култури Руски Керестур.
Тогорочни Фестивал финансийно помогли Секретарият за културу, явне информованє и одношеня зоз вирскима заєднїцами АП Войводини, Город Нови Сад, Городска управа за културу, Завод за културу войводянских Руснацох, Национални совит рускей националней меншини у Рeпублики Сербиї.
