РУСКИ КЕРЕСТУР – Прешлого тижня директорка Штреднєй школи „Петро Кузмяк” Наталия Будински и управнїца Дома школярох Лїляна Фина нащивели Болоню и подписали спорозуменє за фахову праксу ґимназиялцох.
Нащива витворена у рамикох Еразмус проєкта у хторим участвує керестурска школа, а директорка школи Будинскова подписала спорозуменє зоз вивершним директором компаниї UNISER Андреом Ломбардийом хтора ше занїма зоз орґанизованьом праксох за школярох и наставнїкох у Европи.
Так 15 школяре з керестурскей школи з першей и другей класи ґимназиї у априлу того року годно пойсц на фахову праксу до єдней штреднєй школи у Болонї. З тей нагоди школяре у Болонї буду дзешец днї, а трошки пребуваня и путованя обезпечени зоз Еразмус проєкта.
После проєкту фаховей пракси хтори керестурска школа витворює у Греческей за школярох туристичного напряму, нагоду за таке тераз буду мац и школяре общого образованя тє. ґимназиї на руским и сербским наставним язику хтори исную у керестурскей Школи.
На фахову праксу до Солуну „туристи” ше збераю и того року, початком марца.