РУСКИ КЕРЕСТУР – У Ресторану „Бостонˮ, пияток, 9. фебруара, по другираз отримани такволани Бал рекреативкох, односно, друженє женох хтори ходза на рекреацию до Спортскей гали ґу фитнес инструкторки Лїляни Еделински, а хтора источашнє и орґанизатор того друженя.
На друженю рекреативкох, як го вони наволую, хторе було завартого типу, односно насампредз за членїци фитнесу, присутни були вецей як 70 жени старосци од 30 по 80 роки.
Вечар почал зоз словом орґанизаторки хтора привитала свойо фитнес членїци, а окреме представительки Туристичней аґенциї „Тителпревозˮ зоз хторима рекреативки маю добре сотруднїцтво. Їх услуги автобуского превозу рекреативки длугши час хасную за одход на рижни путованя през лєто, у периодзе кед нє отримую вежбанє у Спортскей гали, та з тей нагоди им спомнута аґенция подаровала вредни награди у форми штирох путованьох, два до Мадярскей и два до Босни.
Орґанизаторка, Лїляна Еделински, постарала ше и за други вредни награди на томболи, хтору финансовали рижни спонзоре з валалу, алє и зоз Вербасу, чия вкупна вредносц була коло 2.500 евра. Попри меблю, ваучерох за купованє рижних продуктох и услугох, и двоме маляре з валалу даровали свойо уметнїцки малюнки.
Окрем главней вечери, понукнута була и слана закуска, як и „сладки столˮ на хторим були виложени традицийни колачи, а же би ше заш лєм примерковало и на витки стас, Еделинскова обезпечела и здраву закуску у форми овоцох.
За веселу атмосферу того вечара задлужени були гудаци Владимир Югик Юшо и його приятелє.
