РУСКИ КЕРЕСТУР – Ище єден успишни Бал Дому култури, треци по шоре, отримани всоботу 4. новембра у ресторану „Бостон” у Руским Керестуре на хторим ше, у преважно рускей музики вешелєли коло 90 нащивителє рижних ґенерацийох.
Такой по приходу госцох, орґанизаторе привитали шицких присутних, а нєодлуга були уручени и дарунки пари хтора перша затанцовала, а то були Адриана и Борис Барново.
За нащивительох того року орґанизаторе уведли новитет, окремни куцик за фотоґрафованє, за хтори була задлужена фотоґраф Ивана Медєши.
Источашнє док тирвало фотоґрафованє було и друге бависко, такволани Рулет танєц, односно танєц на випадованє, а щешлїва пара того вечара були Иван Планчак и Теодора Русковски.
После кратшого блоку танцованя и друженя, ушлїдзел музични квиз, у хторим задаток бул одгаднуц шпиванки хтори би у кратких тактох одграл бенд. Найвидши и зоз найвецей точнима одвитами достал награду, а то на соботовим Балу бул Иван Емейди.
После музичного квизу зоз бендом „Коцурски бетяреˮ предлужело ше вешелїц до годзини после полноци, а орґанизаторе и того року були Андрея Штефанко, Сашо Палєнкаш и Желько Ковач.
