НОВИ САД – Вельки ювилей, 100-рочнїца од друкованя першого числа перших новинох на рускей бешеди при бачваньско-сримских Руснацох „Руски новини” хтори обявени у децембру 1924. року, означени вчера у Заводзе за културу войводянских Руснацох.
На подїї хтору орґанизовала Новинарска асоцияция Руснацох – НАР, участвовали директор Заводу за културу войводянских Руснацох Саша Сабадош, директор НВУ „Руске слово” др Борис Варґа, длугорочни новинаре и редакторе програмох по руски Радио-телевизиї Войводини Мария Тот и Мирко Канюх, а модераторка програми була новинарка Александра Бучко.
Рочнїца „Руских новинох” була лєм повод же би представителє рускей медийней заєднїци предискутовали о поукох хтори мож вицагнуц з предходних 100 рокох континуалного информованя по руски, як и можлївих перспективох дальшого розвою руских медийох. Окреме акцентовани виволаня, дзепоєдни специфични за нашу заєднїцу, док дзепоєдни ґлобални – неґативни демоґрафски тренди, проблем финансованя и асимилацийни процеси, алє и нєпреривни алє вше швидши пременки медийней сцени, технолоґиї и перцепциї публики.
Пред малочислену алє компетентну публику – колеґами, заключене же ше руски медиї од снованя та по нєшка зочовали з кризами, алє вше було капацитету превозисц их и адаптовац ше на нови условия роботи и функционованя.
