У Бачинцох, мож повесц, нє у такей далєкей прешлосци, велї обисца продуковали капусту, так же окрем нєшка познатей „футожскей капусти”, и капусту з Бачинцох познату по добрим квалитету, людзе глєдали и куповали. На тоти прешли часи нас здогаднул Славко Цупер, пензионер зоз Шиду, по походзеню з Бачинцох. У парастским обисце Цуперових ше обрабяло жем, ховало барани, робело у винїци, садзело капусту… И вон у тих роботох од яри по позну єшень бул запратани
– Капусту зме продуковали з нашеня хторе ше шало коло 10. мая, а на початку юлия ше капусту пресадзовало. Мали зме заграду на концу валала и там прецекала вода хтору зме хасновали за залїванє пресади. Було то дас коло три ферталї гольта на хтору ше пресадзовало коло 5.000 фалати капусти. Я ю залївал з воду хтору сом ношел у каблє кажде рано, алє и пополадню. Капусту требало и окопац и допатрац, а вона швидко росла, бо єй озда одвитовало подруче – гвари на початку розгварки Славко Цупер.

Було роботи, алє ше и заробело
А уж концом октобра на шор пришла векша робота – зрезованє главкох капусти. Главки звичайно були чежки од 2,5 по три килограми, а капусту ше предавало на пияцу у Шидзе. Понеже часто нє могло шицко там попредац, Славков оцец Владимир з кочом на коньох по улїцох понукал и так предавал капусту. Бачинчанє ю куповали, алє ту було и купцох зоз Куковцох и Ґибарцу, хтори знали же є доброго квалитету. Предавало ше ю до мешаца, но з оглядом на тото же капусти було надосц, а требало ю шицку попредац, Цуперово на кочу одходзели и до Бапскей. Славко уж теди бул студент на першим року Правного факултета у Новим Садзе.
– Паметам же зме до Бапскей ходзели внєдзелю. Вчас зме ше порихтали и рушели же бизме до валалу сцигли пред Службу Божу, а звекшого там жили Горвати хтори ходзели до церкви. А нє раз ше случело же нам у драже, даґдзе на брегу на Телеку, главки почали випадовац з коча. Скочел сом долу и швидко зберал капусту, а цо сом нє сцигол, раховал сом же позбераме док ше будземе врацац дому. Но, нє так же ше нє попредало, дацо пред Службу Божу, дацо пополадню, а паметам же зме капусту у драже зохабяли и родзини у Беркасове. Вечар сом ше врацал до Нового Саду на факултет – памета Славко и додава же часто спомина и тото же го капуста вишколовала.
Черешнї ношел до Сплиту
А окрем капусти, по пияцох ше предавало и шицко друге цо ше дома випродуковало. Наш собешеднїк нам виприповедал и цикаву подїю вязану за предаванє черешньох (фруштох), бо мали штири вельки стебла хтори часто барз добре зродзели.
Славко мал пайташа хторому оцец робел на гайзибану, та му помогол попредац черешнї аж на морю.

– Вєдно з оцом зме наоберали штири вельки кошари черешньох, а мац их од горе прикрила зоз красним партком. На кочу зме пошли до Шиду, пред тим як гайзибан вечаром на седем мал рушиц. Покладли зме до ваґона кошари з черешнями и уж рано коло шейсцох сом бул у Сплиту. Пияц бул блїзко, а ношел сом зоз собу и менши килаш. Медзитим, наишол єден накупец хтори робел за познати готел, та кед видзел яки мам красни черешнї, а на пияцу их анї нє було, заплацел ми барз добре и шицко одо мнє купел, аж ми дал и папер як потвердзенє о тарґовини. Пополадню на штири рушал гайзибан до Беоґраду, та сом мал часу ище зачириц ше до моря и окупац – памета Славко.
Дому до Бачинцох врацел лєм малу кошарку, а вельки кошари з черешнями остали у Сплиту, бо пошли до готелу.То теди були щешлїви часи, бо ше шицко могло и предац, а и тарґовище було векше як нєшка. Наш собешеднїк далєй предлужує о фамелиї, же их у Цуперовим обисцу було седем души, оцец Владимир и мац Ана, потим дїдо Дюра и баба Мария и дїдова шестра Мелана, як и Славко и його власна шестра Агнетка. Обрабяли 16 гольти жеми, мали два винїци, а од 1956. року жили у центре валала прейґ драги грекокатолїцкей церкви.
Кажде робел свою роботу
– Оцец найвецей обрабял жем, а дїдо ше старал о овцох, бо зме мали коло 70 фалати. Звичайно зме мали коло осем гольти кукурици, штири, пейц гольти жита и обовязно два гольти бетелїни. Грозно з винїци зме предавали у Винковцох на пияцу и ношели зме го тиж на гайзибану, а вино у Комлетинцох, Лїпову, Ямени и Строшинцох. То була дїдова робота, вчас рушал на кочу, а вино було у гордовох. Людзе звичайно куповали по пейц литри чарного вина. Предавало ше и у Дєлетовцох, а тиж и у Вишнїчеве и то пред шветом святого Миколая, алє тим лєтним 22. мая – памета Цупер.

А ґу шицкому тому треба спомнуц же Славкова мац предавала сир, масло и шметанку и то на пияцох у Шидзе, Сримскей Митровици, та и Беоґраду. До Митровици ходзела на гайзибану, и там ношела овчи сир. Понеже нє могла сама влєчиц шицко по пияц, на станїци робу покладла на фиякер. Були то часи после Другей шветовей войни, а Славко запаметал же його мац ище 1946. року ношела сир до Беоґраду на пияц, док оцец теди бул катона у Билим дворе при Титови, задлужени за отримованє акумулаторох.
– У тедишнього високого функционера Милентия Поповича служела єдна Шидянка. Вона була порядна мацерова муштерия, вше куповала сир од моєй мацери же би шицко було „преверене”. Так то тирвало даскельо роки. А мац кед нащивела Беоґрад, та накупела и потребни цверни у вули за ґоблени, блиш за шестру, алє и шицко друге цо требало до обисца – гвари на концу Славко Цупер.
Дїдо предавал барани
Славко ше здогадує и як його дїдо предавал барани и як на кочу ишол аж до Биєлїни, бо их там могол добре попредац.
– Требало на кочу исц 45 километри, а дїдо рушел дзень пред тим и зашол до места Дворови, блїзко Биєлїни, бо там мал доброго пайташа. Там и преспал, а вец ютре рано уж бул у Биєлїни. Звичайно предавал по шейсц барани хтори нє були за дальше карменє, а Муслиманє их куповали за их швето Байрам – памета Славко.
З капусти було за квартель
Наш собешеднїк гвари же у здогадованю на роботи дома, на полю и по пияцох, найбаржей запаметал кед ше робело коло капусти, бо и сам участвовал у продукциї и єй предаваню.
– Ище як хлапец сом робел коло капусти, алє и познєйше як леґинь док сом студирал. За пенєж од предатей капусти було и за квартель у Новим Садзе, и за костиранє у мензи. Кед сом закончел факултет и почал робиц, вецей сом нє робел коло капусти, а родичи теди капусту нє садзели навелько як дакеди – гвари Цупер.
