КУЛА – Тих дньох, предсидатель кулскей општини Дамян Милянич привитал юниорску екипу Карате клубу „Гайдук”, медзи хторима бул и Керестурец Ґлориян Штранґар, а на приєму бешедоване о просторийох у хторих би каратисти могли тренирац, понеже ше членом клубу тренинґи одвиваю на трох локацийох.
Окрем Штранґара, на приєму при предсидательови општини були и – Михайло и Милош Крнаяц, Марко Пуцар и їх тренер Никола Ґребер, а з тей нагоди бешедоване и о успишней сезони тей спортскей екипи.
Тренер Гайдуку, Никола Ґребер, визначел же їх потерашня сезона була барз успишна, хлапци екипно освоєли Куп и Першенство Сербиї и слово о озбильних поєдинцох и тимских бавячох.
Тренер наглашел и тото же сезона крунована зоз историйним успихом и титулу Михайла Крнайца хтори на медзинародним змаганю „Лиґа младих” у Поречу виборел златну медалю, та би им вибудов карате сали значно олєгчал условия за трениранє и саме функционованє и же би екипа у тим случаю могла буц под истим закрицом.