Кажда жена, алє и хлоп, свидоми же фризерска робота важна и же схопного и доброго фризера треба ценїц. То особа хторей зверюєме свойо власи, часто свойо думки и розположеня. Крашнє то препущиц ше фризерови, и як конєчни резултат, после дакеди и вецейгодзиновей роботи, у жвератку видзиц свою задумку и фризуру яку зме жадали. Єдна з тих зоз чийого салону виходза лєм нашмеяни жени з найкрасшима власами то наша собешеднїца, фризерка Ксения Бесерминї зоз Коцура.
Од вчасного дзецинства Сенка, як ю шицки волаю, була прешвечена зоз чим ше жада занїмац. Свой талант положела до служби краси, допатраних и красних власох, и успишно крача по драги доброго фризера уж вецей як двацец роки.
– Моя класна зоз основней школи и дзень-нєшка, кед ше стретнєме, спомина же сом ровно гуторела же док вирошнєм будзем фризерка. Любов ґу власом и красним фризуром тирва од малючка. Здогадуєм ше, же кед зме були мали,та зме зоз пайташками єдна другей правели фризури. Бабки нам тиж були модели, алє при товаришкох сом вше була главна фризерка. Познєйше, кед сом почала ходзиц до стреднєй школии озбильнєйше виучовац тото ремесло, мама, баби, товаришки, шицки дзечнє шедали на мой фризерски карсцель. Баби сом раз аж и до уха заштригла, алє ше нє нагнївала, була свидома же ше початнїцки гришки случую. Мойо найблїзши ми були модели и з нїма сом ше учела и усовершовала – гварела о своїх початкох у фризерским ремеслу Сенка.
Кед закончела основну школу, Сенка уписала стредню за фризера у Новим Садзе, и там найвецей часу теди препровадзовала. Научене практично применьовала вше кед мала шлєбодного часу. Понеже бивала просто салону дзе ходзела на праксу, як гвари, лєм през облак закуковала же чи полни салон, и накадзи видзела же єст роботи и муштериї, такой бежала там.
– Барз вельо сом на праксу ходзела, як ше гвари, влапац ремесло. Пошвидко сом и по валалє почала робиц, и ниа, тирва то уж и вецей як двацец роки. Ножнїчки и гребень сом нє випущовала з рукох од часох як сом почала ходзиц до школи за фризерох – гварела Сенка.
ЗАНЇМАНЄ У КОТРИМ НЄПРЕРИВНО УЧИШ
Кед закончела стредню школу, Сенка остала робиц у Новим Садзе у єдним фризерским салону. Нєодлуга ше врацела до Коцура, робела у валалє, алє место ю нє тримало и ознова пошла до городу. Заш лєм, якошик ше животни дражки ознова так лєм понамесцали же би ю приведли до родного валалу, дзе остала жиц.
– Мам свойо порядни муштериї, и можем повесц же наисце мам вельо роботи. Занїманє фризерки барз интересантне, понеже ту нєт правила, и анї єден роботни дзень нє исти. Дараз єст вецей фарбеня, дараз лєм стриганя, кед єст свадзби, лєбо даяки бали, преслави, теди найвецей правим фризури, а ту и нєзаобиходне фениранє. Окрем того, то робота у котрей нєпреривно мушиш учиц, мушиш ше едуковац, бо вше даяки нови технїки роботи виходза, нови фарби за власи, а и шветочни фризури вше єст даяки нови, тренди ше меняю. Так же, ученє у тей роботи нїґда нє престава – толкує Сенка.
Тото цо добре у нєшкайших часох то же ше велї едукациї окончує онлайн, а понеже Сенка ма мале дзецко, єй то барз помага. Може ше уклопиц зоз своїм шлєбодним часом, може учиц з дому, провадзиц преподаваня прейґ компютера, найчастейше теди кед мали Максим шпи.
– Найвецей едукациї котри сом провадзела були зоз Русиї. Велї сом вислухала, а нє було ми чежко, анї провадзиц понеже сом у школи учела русийски язик, и шицко то дзешка ту остало. Кед ше законча едукациї достанєш и сертификат, окреме за кажду обласц и технїку роботи котру прейдзеш. Так же едукациї, котри провадзим, углавним з иножемства, а окрем з Русиї, провадзела сом и едукациї з Бразилу. Вони маю вельо интересантни технїки котри ше, углавним, базую на тим же биш цо швидше робел, же биш ше цо менєй затримовал з єдну особу. Понеже даєдна робота тирва и по осем годзини, а даєдна и длужей, завиши цо ше роби з власами, та треба то и муштериї шедзиц тельо, а и фризерови стац. Алє, на концу, з каждей роботи з власами, з каждей фризури ше дацо и научи – щиро гвари Сенка.
ЗДРАВИ И ДОПАТРАНИ ВЛАСИ ВШЕ У МОДИ
Як бешедує коцурска фризерка, тренди ше нєпреривно меняю, а тераз єй найчастейше приходза фарбиц ше на блядо. Од фризурох найглєданшa ґлам-вейв (габасти власи), з такима власами мож правиц рижни контї, репи, алєи фениранє на ровно роками нє виходзи з моди. Тото цо ровно надпомина шицким муштерийом то же допатранє власох барз важне, а красни, здрави и допатрани власи вше у моди. Виклери и гауби, котри ше дакеди хасновало вецей нє заступени у фризерских салонох, тераз ту рижни пейґли за власи, фиґара, и резултат вше исти – нашмеяни матурантки, млоди, дзивки и жени котри опрез Сенкового жвератка стоя зоз найкрасшима фризурами.
– Робим кажди дзень, дакеди и по дзешец, дванац годзини. Добре лєм тото же сама себе можем орґанизовац роботни час. Шлєбодного часу мам барз мало, понеже окрем роботи, ту и обовязки коло фамелиї, обисца, дзецка. А и час котри бим могла вихасновац за одпочивок, и теди патрим же бим була на даякей едукациї – з ошмихом припознава и предлужує – скорей, док сом нє мала Максима, у шлєбодним чаше сом штрикала и так сом ше опущовала. А штрикац сом ше научела сама, зоз знїмкох на Ютюбу. Штрикала сом шали, шапки, брушлїки, сукенки за братово дзивчатка, лєтни торби зоз шпарґи… Барз ми було приємне за опущованє пальцох после фризерскей роботи, а и за поцешенє же цо ґод най сом обдумала и направела, шицко було уникат.
СХОПНИ РУКИ, ТАНЦОШСКИ НОГИ И КРАСНИ ГЛАС
Окрем спомнутих схопносцох и талантох, Сенка вельо роки була и активна танцошка у фолклорней ґрупи КУД „Жатва”. Уживала у шицким цо мало вязи зоз руску културу, танцом и музику, та ше так нашла и з микрофоном у рукох и успишно плївала по шпивацких водох скоро єдну децению.
– Єден час сом шпивала у ґрупи „Дюла и приятелє”, и робели зме на свадзбох, рижних преславох. Вельо ту красни памятки, друженя, хвильки котри ше нє забува. Теди сом жила и робела у Новим Садзе, та сом єден дзень у тижню приходзела на проби, за викенд бежала до Коцура з роботи кед зме даґдзе мали „свирку”, а вец ище док сом у валалє дакого и вифризирала. Кед ше тераз огляднєм, наисце нє знам як сом то шицко посциговала, алє озда то младосц.Потим сом упознала терашнього супруга Ивана, одала сом ше, та пришли други даяки плани и обовязки, и почувствовала сом же час охабиц микрофон. Тераз зашпивам лєм так, за свою душу, зоз своїм дружтвом– гвари Сенка з ошмихом.
Нашей собешеднїци ше поспишує буц успишна фризерка, алє и фамелийна жена. И сама визначує же нє лєгко буц вше присутни и сконцетровани вшадзи, алє зоз нєсебичну потримовку свойого супруга и сина Максима, Сенка зоз шмелима крочаями и найвекшим ошмихом на твари идзе лєм напредок.
– Робота и напредованє, то вшелїяк мойо плани за будучносц. Усовершованє у фаху барз важне, алє нєобходне направиц ровновагу и уживац у фамелиї, зоз наймилшима и найблїзшима. Мой син мойо найвекше щесце, и нєт векшей радосци як його нашмеяни очка кед зме вєдно, кед ше бавиме, правиме креативни роботнї, учиме, и тоти хвильки, наймилши шерцу, бим нє меняла нїзач на тим швеце – закончела приповедку наша собешеднїца, фризерка Сенка Бесерминї зоз Коцура.
РАДОСЦ У НАПРЕДОВАНЮ И У ФАМЕЛИЇ
Кед жадаш буц успишни, як у каждей роботи, так и у живоце, нєбходни нєпреривни труд и закладанє.
– Буц фризерка то найкрасше занїманє котре сом могла вибрац. Любим кед одо мнє муштериї виходза з ошмихом на твари, задовольни зоз собу. То найлєпши знак же свою роботу окончуєм добре, а кед робиш з любову, з красним словом и у приємней атмосфери, вец успих нє може виостац. А час у фамелиї, препровадзени з найблїзшима, зоз супругом Иваном и сином Максимом, щесце котре нє ма цену, а без того би нїч нє було таке красне яке є – визначела наша собешеднїца Ксения.
