Дзеци у висших класох найбаржей читаю кнїжки на теми друженя и залюбйованя, а дзеци у нїзших класох найволя читац о животиньох, рошлїнох и путованю.
Нєшкайши будинок Основней школи „Йован Йованович Змай” у Дюрдьове вибудовани давного 1908. року и гоч нє постоя точни податки кеди почала робиц школска библиотека, нєшка єй дзвери отворени шицким школяром хтори жадни знаня, инсипирациї и мриї. На єй полїчкох ше чува кнїжки хтори образую, алє и приповедаю приповедки хтори школяром приноша радосц и розвиваю їх креативносц.
Богати фонд кнїжкох
По доступних податкох, хтори зме достали од управи школи, до тераз у тей школи робели дзешец библиотекаре. Кажде з нїх охабел свой шлїд у роботи библиотеки и допринєсол єй розвою и популаризациї медзи школярами.
У роботи библиотеки, у тей хвильки, активно участвую наставнїца руского язика Мария Самарджич, наставнїца сербского язика Мелания Михняк, як и наставнїк сербского язика Оскар Пурґич. Їх улога нє лєм помогнуц школяром коло вибераня кнїжкох, алє и инспировац их и унапрямовац ґу читаню, пестованю писменосци и розвою култури виражованя. Пре їх ентузиязем, библиотека постала нє лєм место на хторим ше пожичує лектири, алє и куцик хтори пестує любов ґу читаню.
Библиотека Основней школи „Йован Йованович Змай” ше може похвалїц зоз богатим фондом рижнородних кнїжкох, а ма коло осем тисячи наслови на сербским и на руским язику. Кнїжки на руским язику барз значни школяром хтори наставу провадза на руским язику, прето же им оможлївює читац дїла на своїм мацеринским язику и лєпше ше упознац зоз свою културу. Таке понукнуце кнїжкох доприноши зачуваню мултикултуралносци и язичней розличносци, з чим ше окреме цеши дюрдьовска школа.
На полїчкох ше находза дїла розличних жанрох, од класичних кнїжовних дїлох, по новши виданя, же би школяре могли прешириц свойо попатрунки на швет и збогациц свойо образованє.
– Дзеци найволя читац авантуристични и динамични кнїжки. У остатнї час ознова популарне читац стрипи, а и школяре заинтересовани за нїх, та зме до школскей библиотеки докупели и даскельо стрипи. Обачела сом же єст вше вецей тих хтори любя читац поезию, алє модерну, сучасну, хтора ма гумористични елементи и хтори блїзки школяром по темох. Дзеци у висших класох найбаржей читаю кнїжки на теми друженя и залюбйованя, а дзеци у нїзших класох найволя читац о животиньох, рошлїнох и путованю – гварела нам наставнїца Мария Самарджич.
Заняти у библиотеки нам гварели же ше намагаю понукац рижнородни наслови. Дзеци можу сами опатрац кнїжки. Упознати су зоз тим як ше треба справовац у библиотеки и барз су осторожни цо ше того дотика. Шлєбодно можу виберац кнїжки хтори им прицагую увагу, алє знаю же кед их вежню же их муша врациц на свойо место и мерковац же би карточка од кнїжки нє випадла и нє затрацела ше.
Визуална хвилька значна
Дзецински кнїжки моцне средство за промовованє важних вредносцох при дзецох. Праве през нїх, дзеци ше стретаю зоз розличнима шветами и характеристиками и так можу учиц о приятельстве, толеранциї и почитованю розличносцох. Приповедки хтори ше находза на бокох дзецинских кнїжкох можу илустровац значносц прилапйованя и почитованя розличносцох медзи людзми, як и значносц розвою емпатиї и порозуменя у приємним и доступним формату за дзеци. Кнїжки нє лєм же забавяю и уча дзеци, алє им даваю и порив же би роздумовали о важних питаньох, як цо то прилапйованє, уважованє и помоц другим. Кнїжки нас, тиж так, уча о тим як треба превозисц предрозсудки и зраженя през диялоґ, сочувствиє и порозуменє. З єдним словом, дзецински кнїжки представяю важни алат за образованє и формованє дзецох до чувствительних и толерантних особох, цо барз значне за вибудов гармоничних и инклузивних заєднїцох у будучносци.
Кнїжку нє мож полюбиц прейґ ноци, алє тоту любов треба розвивац од дзецинства. Визуална хвилька барз значна при дзецох. Красни фарби на рамикох и илустрациї то перше цо прицагнє дзецко же би вжало кнїжку до рукох и же би почало читац.
– Як просвитни роботнїки, родичи и гражданє, ми дзецом жадаме вше лєм найлєпше. Сцеме же би вони одрастали у лєпшим швеце, розвили емпатию, почитованє и любов ґу другим и намагаме ше мотивовац их же би почитовали тоти и велї други вредносци. Прето треба од дзецинства усадзиц любов ґу кнїжком при дзецох – визначела Самарджичова.
Библиотеку ше поряднє збогацує зоз новима насловами, а средства за набавянє нових кнїжкох ше обезпечує зоз буджету хтори школа достава од Министерства просвити, науки и технолоґийного розвою Републики Сербиї. Дзекуюци тому, континуовано ше дополнює фонд кнїжкох и так ше го отримує же би бул актуални.
– У остатнї час, акцент на тим же би ше куповало кнїжки котри наисце потребни, без огляду на тото чи то наслови хтори часц обовязней школскей литератури, чи то популарни литературни дїла хтори школяре дзечнє читаю. То нам оможлївює же би ше средства рационално потрошело, же би библиотека задоволєла потреби шицких хтори до нєй учланєти и же би остала значна часц школского живота – гварели нам зоз управи школи.
Зоз управи нам гварели же сцу школску библиотеку прешириц же би достала нови, сучасни випатрунок. Планую ю злучиц зоз учальню хтора ше находзи коло, же би мали векшу просторию хтора будзе обдумана як медиятека. Циль того проєкта же би библиотека постала место на хторим ше школяре дзечнє буду затримовац, дзе вежню кнїжку и буду ю читац, без же би ю ношели дому, и дзе буду школяром доступни шицки ресурси за здобуванє нових знаньох.
