КОЦУР – Фодбалски клуб Искра зоз Коцура пририхтованя за нову сезону у Войводянскей фодбалскей лиґи Сивер 2024/25 започала пондзелок 7. юлия, дзе на першим тренинґу присуствовали скоро шицки бавяче.
Бавяцки кадер за шлїдуюцу сезону дакус пременєти, алє остава иста амбиция же би ше виборело обстоянє, а тиж и вибориц лєпши конєчни пласман на таблїчки.
На концу сезони клуб напущели Никола Адамович, Милан Ефендич, Марко Грнячки, як и тренер Мирослав Кнежевич. Помоцнєня котри пришли до клуба то Алекса Дорокхази, Марко Неделькович, Милош Петкович, Боривой Цветкович, як и уж познате мено на место тренера Ранко Делич Цако.
ФК Искра одбавела уж два пририхтуюци стретнуца, перше у комбинованим составе страцела од екипи ФК Ветерник зоз резултатом 7:3, док друге стретнуце екипа Искри одбавела у Коцуре зоз екипу Будучносц зоз Савиного Села и зазначела побиду зоз резултатом 3:2.
За екипу Искри процив екипи Будучносци бавели: Вид Неделькович, Лазар Милованович, Милорад Ваяґич, Андрей Малацко, Дамян Ґубаш, Павле Човс, Давид Гарди, Милош Петкович, Димитриє Ґрубачич, Боривой Цветкович, Душан Бокан, Мариян Малацко, Зоран Сердар, Алекса Дорокхази, Лука Дорокхази, Стефан Шошкич и Дарко Салонтаї.
Шлїдуюце пририхтуюце стретнуце котре одбави екипа Искри будзе на нєдзелю 27. юлия у Руским Керестуре зоз екипу Русина.
