СТАРИ ВЕРБАС – У Грекокатолїцкей церкви Покрова Пресвятей Богородици у Старим Вербаше внєдзелю, 17. децембра, преславене швето Святого Миколая.
У Служби Божей парох старовербаски о. Алексий Гудак присутних вирних здогаднул на дїла святого оца Миколая, бешедовал о його доброти и значносци. Тото швето того святочного дня прикрашели шицки присутни вирни зоз молитву и шпиванку.
З нагоди того швета отримана и пригодна програма котру пририхтали учителька Славица Мали зоз школярами основних школох зоз Вербасу котри уключени до настави руского язика зоз елементами националней култури и вироучителька Ксения Бесерминї зоз виронаучнима дзецми грекокатолїцкей вири. Шоровали ше числени шпиванки и рецитациї на чесц святого оца Миколая, а у музичних точкох програми дзеци на гармоники провадзел Любомир Скубан.
Як и предходних, и того року Миколай нащивел дзеци у старовербаскей парохиї, а по законченю програми и краткей розгварки з нїма, обрадовал наймладших и з тей нагоди подзелєл 65 пакецики.
Парох старовербаски о. Алексий Гудак подзековал фамелиї котра, як гварел, зробела добре дїло и обезпечела средства за тогорочни пакецики. Тиж виражел подзековносц шицким вирним же пришли у таким чишлє преславиц швето святого Миколая, а було их вецей як 120 у Служби Божей, як и дзецом же виведли красну програму на чесц того швета.
