ДЮРДЬОВ – Прешлого тижня почали роботи на реконструкциї главней улїчки у Дюрдьове, прецо вона дочасово заварта. До Жаблю мож пойсц по алтернативней драги хтора водзи прейґ дильова хтори почина на концу лїчки Николи Тесли.
Два пайташки, Андєла Лазич и Деяна Бечкеречки, будуци школярки другей класи, ше здогадли путнїком, хтори тадзи преходза, понукнуц ошвиженє – лимунаду за символичну цену од 50 динари.
Намира им шицок назберани пенєж од предатих лимунадох уплациц на рахунок Гуманитарней фондациї „Будз гумани” Александра Шапича.
Велї гражданє пришли потримац инициятиву двох пайташкох, а медзи нїма и Иван Михайловски, хтори спред предавальни ,,Шайтош” дзивчатом подаровал ладичку зоз лимунами.