РУСКИ КЕРЕСТУР – Керестурци Владимир Винаї и Иґор Пап штварток, 7. юния влапели харчу чежку 34 кґ. Влапели ю на такволаним Кулским одмаралїщу на Дунаю, штири километри од Боґоєва, у Специялним природним резервату Горнє Подунавє.
Найвекшу рибу у живоце влапели на три дурбоки, мордовали ше коло 10-15 минути зоз ню, алє ю Иґор з власнима руками влапел. Ошацовали искусни дунайски рибаре же риба може мац 30-40 кили. И потрафели: харча була чежка 34 кґ, а длугока 170 цм.
Як гварела Владимирова супруга Оливера, шесце ше нє предава, та зоз риби за фамелию, родичох, приятельох, сушедох и познатих направели госцину: уварели аж два котлїки паприґашу, єден горки, єден за дзеци, а и упражели з нєй. Пахнул паприґаш на Новим населю од пияцу!
