РУСКИ КЕРЕСТУР – У рускокерестурскей парохиї св. оца Миколая вчера на раншей Служби Божей означене нєзаповедане швето старозавитних Макавейских мученїкох – (седем братох и їх мацери хтори дали живот за виру до правдивого Бога) Маковея, и пошвецена вода.
Службу Божу служели капелан о. Владимир Медєши и о. Владимир Мудри котри службує у Горватскей и домашнї капелан о. Ярослав Варґа, а на пошвецаню води ше придружел и о. Михайло Шанта котри под час Служби споведал вирних.
По Служби священїки окончели обряд пошвецаня води зоз хтору потим о. Медєши пошвецел воду котру вирни ґаздинї принєсли з дому у канчовох прикрашених зоз швижим квецом, а пошвецел и цали храм и шицких присутних.
Маковейску воду ше одноши дому и хаснує за рижни потреби души и цела.
