1. ДЕЦЕМБЕР – На нєшкайши дзень народзели ше Микола М. Кочиш и Емил Гудак.
1835 – Ганс Кристиян Андерсен обявел свою першу кнїжку сказкох.
1898 – У Скупштини Сербиї поднєшени перши предлог за снованє Универзитета у Беоґрадзе, односно реорґанизацию Велькей школи и єй прерастанє до Беоґрадского универзитета.
1903 – Приказани перши вестерн филм Велька крадза гайзибана.
1906 – У Паризу отворени кино Омния Пате, перша сала на швеце хтора була наменски вибудована за приказованє филмох.
1918 – У Беоґрадзе преглашена Кральовина Сербох, Горватох и Словенцох, зоз принцом Александром Першим Карадьордєвичом як реґентом и Беоґрадом як пристолнїцу, хтора 1929. року достала мено Югославия.
1928 – Народзел ше руски поета, прозни писатель и линґвиста Микола М. Кочиш (Дюрдьов, 1. децембер 1928 – Нови Сад, 16. април 1973). Основну школу и штири класи ґимназиї закончел у Новим Садзе, потим почал учиц ремесло прецизного механїчара. После Другей шветовей войни Микола М. Кочиш закончел два класи висшей ґимназиї, а вец и Учительску школу у Зомборе. Кратко робел у Бачинцох, а вец од 1950. року бул учитель у Бачким Добрим Полю, у Коцуре и у Руским Керестуре, дзе бул и редактор дзецинского часопису Пионирска заградка. Висшу педаґоґийну школу закончел у Новим Садзе, и як наставнїк робел у Руменки, Сримских Карловцох и новосадскей школи Жарко Зренянин. Уписал ше на студиї и дипломовал сербскогорватски язик на Филозофским факултету, та робел у Покраїнским заводу за унапредзенє общого и фахового образованя. Кед у Новим Садзе основани Покраїнски завод за видаванє учебнїкох, Микола Кочиш бул на месце лектор-редактор у Рускей редакциї. Кочиш, як линґвист вельо допринєсол стандардизациї литературного язика Руснацох, обявел Правопис руского язика (1971), а постгумно видати: Ґраматика руского язика (1974) и зборнїк Линґвистични роботи (1978). Бул перши предсидатель Дружтва за руски язик и литературу. Умар нєсподзивано 16. априла 1973. року, поховани бул на новосадским Руским теметове, алє його посмертни остатки пренєшени на Городски теметов и спочива у алеї пистельох. НВУ Руске слово установела награду Микола М. Кочиш за найлєпше дїло у литератури або науки при Руснацох. Од 1990. року, Дружтво за руски язик, литературу и културу орґанизує манифестацию Днї Миколи М. Кочиша, а каждого пиятого року и науково-фахови сход з обласци руского язика, литератури, култури и просвити.
1936 – Народзел ше економиста-комерциялиста и длугорочни активиста у култури Емил Гудак (Руски Керестур, 1. децембер 1936 – Руски Керестур, 7. децембер 2015) окреме ше роками анґажовал на орґанизованю Фестивалу Червена ружа, насампредз у обезпечованю спонзорох и финансиєрох.
1954 – Основани Филозофски факултет, перши факултет на Универзитету у Новим Саду. Облапя 17 оддзелєня, а медзи нїма и Оддзелєнє за Русинистику. Дзень факултета ше означує 1. децембра.
Нєшка Шветови дзень борби процив сиди.