10. ЯНУАР – На нєшкайши дзень народзени учитель Янко Олеяр, а у швеце ше означує Дзень шмиху.
49. с. n. e. – Римски войсководитель, политичар и писатель Ґай Юлиє Цезар прешол прейґ рики Рубикон у Италиї з чим виволана гражданска война медзи Помпею и Сенатом. З тей нагоди вигварел „Коцка руцена” (Alea iacta est), цо остало запаметане як синоним за шмелу одлуку зоз ризичнима пошлїдками.
1909 – Народзени сербски физичар и хемичар и академик Павле Савич (Солун, 10. януар 1909 – Беоґрад, 30. май 1994), єден з пренаходзачох процесу нуклеарней физиї, по войни орґанизовал Институт за нуклеарни науки у Винчи при Беоґрадзе.
1928 – Народзени Янко Олеяр (Дюрдьов, 10. януар 1928 – Руски Керестур, 11. януар 1994), учитель, просвитни, културни и дружтвени роботнїк. Янко Олеяр робел як учитель у Вербаше, дзе водзел хорску и драмску секцию у тедишнїм КПД Александер С. Пушкин, бул учитель и у Дюрдьове и тиж водзел хорску, музичну и драмску секцию у КПД Тарас Шевченко. Од 1956. року робел у висших класох Основней школи Петро Кузмяк у Руским Керестуре, дзе окончовал и длужносц помоцнїка директора. Од 1961. року бул директор Дома култури у Руским Керестуре, а робел и у Културно-просвитней заєднїци општини Кула. Бул єден зоз сновательох Фестивалу култури Червена ружа, Драмскей секциї Дома култури, Драмского мемориялу Петра Ризнича Дядї, АРТ Дядя. Писал о нашей прешлосци, друковани му велї етноґрафски и други материяли у Новей думки, Шветлосци, Пионирскей заградки, Зборнїку роботох Studia Ruthenicа… Дружтво за руски язик, литературу и културу, од 2012. року, додзелює припознанє з меном Янко Олеяр найлєпшому школярови руского оддзелєня Ґимназиї Петро Кузмяк у Руским Керестуре. Умар у Руским Керестуре 11. януара 1994. року, дзе є и поховани
1998. – Шветови дзень шмиху. Наука о шмиху вола ше ґелотолоґия. Шветови дзень шмиху обдумал 1998. року индийски лїкар Мадан Катария, снователь йоґи шмиху, окремней технїки у хторей ше комбинує ґрупни шмих и йоґа.
