10. ЯНУАР – На нєшкайши дзень народзени учитель, културни и дружтвени роботнїк Янко Олеяр, а у швеце ше означує дзень шмиху.
49. с. n. e. – Римски войсководитель, политичар и писатель Ґай Юлиє Цезар прешол прейґ рики Рубикон у Италиї з чим виволана гражданска война медзи Помпею и Сенатом. З тей нагоди вигварел „Коцка руцена” (Alea iacta est), цо остало запаметане як синоним за шмелу одлуку зоз ризичнима пошлїдками.
1909 – Народзени сербски физичар и хемичар и академик Павле Савич (Солун, 10. януар 1909 – Беоґрад, 30. май 1994), єден є з пренаходзачох процесу нуклеарней физиї, бул професор на Беоґрадским универзитету, предсидатель Сербскей академиї наукох и уметносцох од 1971. по 1981. рок. Шветово познати науковец постал кед зоз Ирену Жолио Кири 1937. и 1938. року одкрили изотопи познатих елементох зоз бомбардованьом атома урану зоз спомалшенима неутронами. У Другей шветовей войни бул вибрани за подпредсидателя на Першим зашеданю АВНОЙ-а, а по войни орґанизовал Институт за нуклеарни науки у Винчи при Беоґрадзе.
1928 – Народзени Янко Олеяр (Дюрдьов, 10. януар 1928 – Руски Керестур, 11. януар 1994), учитель, просвитни, културни и дружтвени роботнїк. Янко Олеяр робел як учитель у Вербаше, дзе водзел хорску и драмску секцию у тедишнїм КПД „Александер С. Пушкин”, бул учитель и у Дюрдьове и тиж водзел хорску, музичну и драмску секцию у КПД „Тарас Шевченко”. Од 1956. року робел у висших класох Основней школи „Петро Кузмяк” у Руским Керестуре, дзе окончовал и длужносц помоцнїка директора. Од 1961. року бул директор Дома култури у Руским Керестуре, а остатнї два роки по пензионованє робел у Културно-просвитней заєднїци општини Кула. У Доме култури у Руским Керестуре основал, водзел и преподавал у нїзшей музичней школи. Янко Олеяр бул єден зоз сновательох Фестивалу култури „Червена ружа”, Драмскей секциї Дома култури, Драмского мемориялу Петра Ризнича Дядї, АРТ „Дядя” и бул Янкo Олеяр бул пресидатель Комисиї за Ґимназию кед 1970. року обновйовани оддзелєня на руским наставним язику у Руским Керестуре. Писал о нашей прешлосци, друковани му велї етноґрафски и други материяли у „Новей думки”, „Шветлосци”, „Пионирскей заградки”, Зборнїку роботох „Studia Ruthenicа” и других виданьох. Дружтво за руски язик, литературу и културу, од 2012. року, додзелює припознанє з меном Янко Олеяр найлєпшому школярови руского оддзелєня Ґимназиї „Петро Кузмяк“ у Руским Керестуре. Умар у Руским Керестуре 11. януара 1994. року, дзе є и поховани.
1998. – Шветови дзень шмиху. Наука о шмиху вола ше ґелотолоґия. Шветови дзень шмиху обдумал 1998. року индийски лїкар Мадан Катария, снователь йоґи шмиху, окремней технїки у хторей ше комбинує ґрупни шмих и йоґа.
