12. ДЕЦЕМБЕР – На нєшкайши дзень народзел ше Михайло Микита.
1873 – У Сербиї запровадзени динар як пенєжна єдинка. Сербия приступела ґу Пенєжней конвенциї хтору у Паризу 1865. року подписали Французка, Белґия, Италия и Швайцарска. Принєшени Закон о пенєжу, зоз чим претаргнути монетарни гаос и хаснованє вецей як 40 файтох цудзого металного пенєжу – дукатох, форинтох, талирох. Динар вжати за пенєжну єдинку бо тота назва на Балкану исновала од старого Риму.
1896 – Сербске учительске дружтво основало у Беоґрадзе Школски музей, хтори познєйше наволани Педаґоґийни музей.
1915 – Народзени шпивач и филмски ґлумец Френсис Алберт Синатра, познати як Френк Синатра (Хобокен, ЗАД, 12. децембер 1915 – Лос Андєлес, 14. май 1998).
1947 – Народзел ше музичар, шпивач Михайло Микита (Руски Керестур, 12. децембер 1947 – Руски Керестур, 11. юний 2000). По заниманю бул машински технїчар и векшину свойого роботного вику, 28 роки, препровадзел у керестурскей Друкарнї Руске слово як машински буквоскладач. Робел и у Зомборе, и у тедишнїм КУД Максим Горки у Новим Садзе, як и у НВП Руске слово. Роботни вик закончел у приватним подприємстве Ю-мебл власнїка Звонимира Надя. Поховани є на теметове у Руским Керестуре.