12. ЯНУАР – На нєшкайши дзень народзел ше ґлумец аматер Юлиян Стрибер.
1628 – Народзел ше писатель Шарл Перо (Париз, 12. януар 1628 – Париз, 16. май 1703), автор познатей збирки сказкох Русалково приповедки, у котрей и сказки Кандур у чижмох, Червена шапочка и други.
1864 – Народзел ше историчар, етноґраф и професор Антоний Годинка (Ладомиров, Снински район, Прешовски край, Словацка, 12. янур 1864 – Будапешт, 15. юлий 1946). До основней и стреднєй школи, а потим и до теолоґийних школох ходзел у Мармарош-Сиґету, нєшка Румуния, Ужгороду и Будапешту. Антоний Годинка робел у библиотеки Мадярского националного музея, бул стипендиста Австрийского историоґрафского институту у Бечу. Докторовал 1891. року, а бул и стипендиста Царскей и кральовскей конфесионалней библиотеки у Бечу дзе виглєдовал палеоґрафию, и историї Южних Славянох (Сербох и Горватох). Од 1906. року бул професор на Правней академиї и Универзитету у Братислави, потим шеф Катедри за универзалну историю, декан Филозофског факултета, а од 1932. року ректор Универзитета у Печую. До пензиї пошол 1935. року, умар у Бидапешту, 15. юлий 1946. року.
1876 – Народзел ше писатель Джон Ґрифит Чейни, познати як Джек Лондон (Сан Франциско, 12. януар 1876 – 22. новембер 1916).
1878 – Народзел ше драматурґ и писатель Ференц Молнар (Будапешт, 12. януар 1878 – Нюйорк, 1. април 1952), творец публицистичного стилу у мадярскей литераттури, котри з романом Юнаки Павловей улїци створел класични твор младежскей литератури.
1941 – Народзел ше ґлумец аматер Юлиян Стрибер (Руски Керестур, 12. януар 1941 – Руски Керестур, 2. юлий 1998), бул член керестурскей сцени Аматерского руского театру, потим Руского народного театру Дядя. У родним валалє закончел основну школу, Школу школярох у привреди закончел у Кули, а шлосерске ремесло виучел у Руским Керестуре дзе нєпреривно и робел. Юлиян Стрибер почал робиц у шлосерскей роботнї, а потим прешол до Друкарнї Руске слово. Кед концом 1969. року почала з роботу Керестурска сцена АРТ Дядя уж мал 10 витворени, а одбавел и 25 векши и менши улоги. Вецей раз виробел и сценоґрафию по нарисох сценоґрафох, бул майстор сцени, а розумел ше и до ошвиценя. Юлиян Стрибер умар 2. юлия 1998. року у Руским Керестуре дзе є и поховани.
1995 – Совит безпечносци Зєдинєних нацийох за ище 100 днї предлужел часточну суспензию санкцийох Союзней Републики Югославиї.
