13. ЯНУАР – На нєшкайши дзень народзени длугорочни заступнїк Руского слова Янко Киш, а вишло и перше число стрипа о Микийови Маусови.
1806 – Народзени сербски писатель Йован Стерия Попович (Вершец, 13. януар 1806 – Вершец, 10. марец 1856), перши сербски комедиоґраф, чийо ше комедиї и нєшка бавя у театрох ширцом жеми. Даєдни з його комедийох: Покондирена тиква, Кир Яня, Спреводзкоше, Зла жена, Родолюбци, виводзени на руским язику на нашей театрелней сцени.
1930 – Видруковани перши новински стрип у хторим ше зявює Мики Маус, компаниї Волт Дизни.
1942 – Народзел ше Янко Киш (Дюрдьов, 13. януар 1942 – Нови Сад, 1. децембер 2022) длугорочни заступнїк Руского слова, вельки любитель историї своїх предкох и почитователь руснацтва. Робел як висококвалификовани електричар у Автоматики у Петроварадину, потим у Войводянским музею и Нафтней индустриї Сербиї. Накадзи пошол до пензиї анґажовал ше у заступнїцтве виданьох Руского слова – кнїжкох, Календара, Шветлосци и на збераню предплатнїкох за новини и часописи. Янко Киш бул длугорочни секретар Союзу Руснацох Українцох Сербиї, а на вецей заводи и член Церковного одбору парохиї св. апостолох Петра и Павла у Новим Садзе. Поховани є у Дюрдьове.
2022 – Нови Сад урядово постал Европска престолнїца култури за 2022. рок и шлїдуюци 12 мешаци бул у центру уваги европскей културней явносци. Першираз єден город зоз Сербиї достал тоту титулу вєдно зоз луксембурґским городом Еш сур Алзетом и городом зоз Литваниї Каунасом.