На нєшкайши дзень, 13. януар

автор пририхтала: В. Вуячич
101 Опатрене

13. ЯНУАР – На нєшкайши дзень народзени длугорочни заступнїк „Руского слова” Янко Киш, сербски писатель Йован Стерия Попович, а вишло и перше число стрипа о Микийови Маусови.

1806 – Народзени сербски писатель Йован Стерия Попович (Вершец, 13. януар 1806 – Вершец, 10. марец 1856), перши сербски комедиоґраф, чийо ше комедиї и нєшка бавя у театрох ширцом жеми. Даєдни з його комедийох: „Покондирена тиква”, „Кир Яня”, „Спреводзкоше”, „Зла жена”, „Родолюбци”, виводзени на руским язику на нашей театрелней сцени.

1930 – Видруковани перши новински стрип у хторим ше зявює Мики Маус, компаниї Волт Дизни.

1942 – Народзени Янко Киш (Дюрдьов, 13. януар 1942 – Нови Сад, 1. децембер 2022) длугорочни заступнїк „Руского слова”, вельки любитель историї своїх предкох и почитователь руснацтва. Робел як висококвалификовани електричар у „Автоматики” у Петроварадину, потим у Войводянским музею и Нафтней индустриї Сербиї. Накадзи пошол до пензиї анґажовал ше у заступнїцтве виданьох „Руского слова” – кнїжкох, Календара „Шветлосци”, а єднак так и и збераня предплатнїкох за новини и часописи. Янко Киш бул длугорочни секретар Союзу Руснацох Україинцох Сербиї, а на вецей заводи и член Церковного одбору парохиї св. апостолох Петра и Павла у Новим Садзе. Поховани є у Дюрдьове.

ПОВЯЗАНИ ТЕКСТИ