На нєшкайши дзень, 14. януар

автор пририхтала: В. Вуячич
52 Опатрене

14. ЯНУАР – На нєшкайши дзень народзени Евґений Джуня, основана Матица сербска и першираз виведзена опера „Тоска”.

1826. року – У Пешту основана Матица сербска на инициятиву Йована Хаджича и вецей сербских пештанских и будимских тарґовцох. Тото литературне и културне дружтво мало огромну улогу у розвою науки и култури Сербох у Войводини, 1864. року Матица сербска преселєна до Нового Саду. Од 1924. року видава найстарши литературни часопис „Лїтопис Матици сербскей”, хтори по нєшка континуовано виходзи, а основани є зоз назву „Сербска летопис” и перше число видруковане у октобре 1824. року у Новим Садзе.

1900 – Виведзена премиєра опери „Тоска” Дякома Пучиния (1858–1924) у Риме у Италиї. Слово о єдней и нєшка найвиводзеншей опери. Праве зоз оперу „Тоска” у новембре 2024. року у Сербским народним театре у Новим Садзе означени Дзень Опери СНП-а.

1919 – Народзени Евґений Джуня, (Руски Керестур, 14. януар 1919 – Нови Сад, 1. авґуст 2020), член першого Редакцийного колеґиюма новинох „Руске слово”, професор, робел у Радио Новим Садзе, перши директор Прекладательней служби Скупштини АП Войводини. Основну школу Евґений закончел у Руским Керестуре, ґимназию у Заґребе, потим Педаґоґийну школу у Новим Садзе, а Правни факултет у Беоґрадзе. Як учитель почал робиц у Руским Керестуре од 1941. року, по законченю Другей шветовей войни меновани є за наставнїка у новоотвореней ґимназиї у Керестуре, пошвидко постава и єй директор. Бул єден з иницияторох за видаванє новинох на руским язику и член першого Редакцийного колеґиюма новинох „Руске слово”. Концом 1949. року Евґений Джуня прияти на длужносц спикера и лектора Радия Нови Сад. Од 1955. року преходзи на роботу до стреднєй школи, а потим, до Прекладательней служби у Скупштини АП Войводини и постава єй перши директор. У Скупштини, як правнїк, остава по пензионованє 1987. року. Умар 1. авґуста 2000. року у Новим Садзе, дзе є и поховани.

ПОВЯЗАНИ ТЕКСТИ