17. ЮЛИЙ – На нєшайши дзень народзена апатикарка Ирина Фейса.
1931 – Народзела ше Иринa Фейса, дзивоцке Сеґеди (Руски Керестур, 17. юлий 1931 – Нови Сад, 22. новембер 2019), була апатикарка и дружтвено-културни дїяч. Основну школу и нїзшу гимназию закончела у Руским Керестуре, а висши класи ґимназиї з вельку матуру по сербски у Вербаше. Студиї фармациї закончела 1954. року у Беоґрадзе. Перше роботне место достала у Вербаше, у Першей народней апатики. Вєдно зоз супругом предлужели робиц у Пиньвиц, а вец робела у Футоґу и у Новим Садзе у апатики Булевар. Єден час шпивала у новосадским церковним хору, алє найвецей препровадзела у екуменскей роботи. Була сотруднїк у публикациї „Новосадски дзвони” и авторка є кнїжки Наш стари дом. Живот и звичаї Руснацох, хтору обявела Грекокатолїцка парохия св. а. Петра и Павла у Новим Садзе 1999. року. Ирина Фейса похована 25. новембра 2019. року на Городским теметове у Новим Садзе.
1975 – Америцки и совєтски вселенски ладї Союз 19 и Аполо 18 злучели ше у Жемовей орбити. Команданти лєтадлох, Алексей Леонов и Том Стафорд, розменєли винчованки при чим Леонов бешедовал по анґлийски, а Стафорд по русийски.
1976 – На XXI Олимпийских бавискох у Монтреалу у Канади 14 рочна ґимнастичарка Надя Команечи постала перши ґимнастичар хтори достал максималну просекову оцену 10. Вона за седем розлични вежби оценєта зоз максималну оцену и освоєла три златни медалї.