18. МАРЕЦ – На нєшкайши дзень народзени др Мафтей Винай.
1844 – Народзел ше композитор и дириґент Николай Андреєвич Римски-Корсаков (Тихвин, Руска Империя, 18. марец 1844 – Любенск, Руска Империя, 21. юний 1908), член композиторскей ґрупи Вельки пейцме и професор гармониї и оркестрациї.
1858 – Народзел ше инжинєр Рудолф Дизел (Париз, Французка, 18. марец 1858 – Ламанш, Сиверне морйо, 29. септембер 1913), хтори 1893. року конструовал перши мотор зоз нукашнїм згорйованьом на принципе самопалєня. Мотор по нїм наволани дизел-мотор.
1898 – Народзел ше др Мафтей Винай (Руски Керестур, 18. марец 1898 – Суботица, 8. децембер 1981). Писатель и судия др Мафтей Винай основну школу закенчел у Руским Керестуре, класичну ґимназию у Заґребе. На Правним факултету, тиж у Заґребе, дипломовал, дзе на истим факултету 1928. року одбранєл докторску дисертацию. Як судия робел у Окружним суду у Сримскей Митровици, мал власну адвокатску канцеларию у Вуковаре, бул срезки подначальнїк у Кули и Оджаку. Робел и у ґимназиї у Руским Керестуре, од єй снованя 1945. та по 1952. рок. Потим бул на службу у Кули, та у Суботици, дзе ше 1962. року пензионовал. Обявена му збирка писньох Ровнїно моя широка (1973), а од 2001. року Руснаци у Суботици кажди рок орґанизую литературну манифестацию Днї др Мафтея Виная. Мафтей Винай умар у Суботици 8. децембра 1981. року.
1962 – Народзел ше линґвист Любомир Омелянович Белей (Войнилїв, Ивано-Франковска обласц, Україна, 18. марец 1962 – Ужгород, Україна, 12. май 2018). Українски оддїл Филолоґийного факултету Ужгородского державного универзитету закончел 1983. року. На Ужгородским универзитету робел од 1986. року – спочатку як асистент, потим як доцент Катедри общей и славянскей линґвистики, а од 1997. року як професор Катедри українского язика. Року 2007. основал и постал руководитель Науково-виглєдовацкого институту українистики Михайло Мольнар. Сфера його наукового интересованя була українска и славянска ономастика, история українского литературного язика, старославянски язик, язик и култура українскей дияспори, а робел и у обласци лексикоґрафиї и прекладу. По руски, у виданю НВУ Руске слово з Нового Саду вишла му кнїжка Славянски язик, родзенє и живот мертвого язика (2016). Професор Любомир Белей поховани у Ужгородзе 15. мая 2018. року.
Шветови дзень рециклажи. Запровадзени є 2018. року, и того дня ше промовує рециклажни материяли як вредни ресурси, а нє як шмеце, и суґерує циркуларну економию.