19. ФЕБРУАР – На нєшкайши дзень народзени професор Мирон Будински.
1473 – Народзел ше польски астроном Никола Коперник (Торунь, Польска 19. фебруар 1473 – Фромборк, Польска, 24. май 1543) бул математичар, правнїк, лїкар и економиста, перши науковец хтори формуловал гелиоцентричну систему нєбесних целох.
1922 – У Заґребе вишло перше число новинох „Борба”.
1931 – Народзел ше писатель, математичар и професор Мирон Будински (Руски Керестур, 19. фебруар 1931 – Нови Сад, 3. юний 2018). Основну школу закончел у своїм валалє, а до ґимназиї ходзел у Ужгородзе и Руским Керестуре. Висши класи ґимназиї зоз вельку матуру закончел у Бачким Петровцу 1951. року, а Природно-математични факултет у Беоґрадзе 1955. року. Робел як професор у ґимназиї у Старей Пазови, а вец у Индустрийней школи зоз практичну обуку, 1960. року є поставени за асистента на Технолоґийним факултету у Новим Садзе и ту роби полни єденац роки. Потим робел як професор математики у ґимназиї у Србобрану же би ше врацел на место фахового сотруднїка на Технолоґийним факултету у Новим Садзе. До пензиї пошол одкаль 1996. року. Мирон Будински охабел вельки шлїд у рускей литератури, його писнї и приповедки обявйовани у Пионирскей заградки, Календарох, и у часопису Шветлосц. Бул член Дружтва писательох Войводини од 1971. року, його кнїжка сказкох за дзеци Воденїчка на стриберним потоку була школска лектира. Мирон Будински поховани 5. юния 2018. року на Новосадским теметове.
1977 – У Букурешту подписане югославянско-румунске спорозуменє о заєднїцким хаснованю Дунаю и вибудови гидроцентрали Дєрдап 2.