20. ЯНУАР – На нєшкайши дзень язик Руснацох з Войводини реґистровани у Медзинародним стандарду за реґистрованє язикох.
1775 – Народзени Андре-Мари Ампер (Лион 20. януар 1775 – Марсей, 10. юний 1836), французки физичар и математичар, член Парискей академиї наукох и член велїх иножемних академийох наукох. Снователь електродинамики. Засновал теорию маґнетизма у нєроздвойней вязи зоз електрицитетом и преучел взаємне дїйство електричних струйох. Йому на чесц єдинка за моц струї наволана ампер, єдинка за количество електрицитету амперсекунда и ампергодзина, а инструмент за меранє моци струї амперметер.
1890 – Народзел ше етномузиколоґ и композитор, академик др Винко Жґанец (Вратишинец, 20. януар 1890 – Заґреб, 12. децембер 1976), бул мелоґраф, музиколоґ, етномузиколоґ, записовал народни танци, обяди и обичаї. Автор є кнїжки „Пјесме Југославенских Русина”, то збирка народних шпиванкох, хтори др Жґанец позберал и обявел 1946. року. У збирки єст 116 аранжмани, односно 102 шпиванки з хторих даєдни маю вецей вариянти. На збераню руских шпиванкох за кнїжку помагал му учитель Михайло Ковач.
1920 – Народзел ше филмски режисер и сценарист Федерико Фелини (Римини, 20. януар 1920 – Рим, 31. октобер 1993). Тримани є за критичара дружтвених зявеньох у инталиянским гражданским дружтве у чаше после Другей шветовей войни. Добитнїк є трох Оскарох – награди за уметнїцку и технїчну роботу у филмскей индустриї.
1990 – У Беоґрадзе почал остатнї конґрес Союзу комунистох Югославиї. Позарядови 14. конґрес СКЮ отримани од 20. по 22. януар у беоґрадским центре „Сава”. Присуствовали делеґати зоз шицких републикох и покраїнох тедишнєй СФРЮ, як и партийна делеґация ЮНА. Конґрес нїґда нє закончени.
2022 – Язик Руснацох з Войводини урядово реґистровани у Медзинародним стандарду за реґистрованє язикох ISO 639-3, достал идентификацийни код rsk а пoд меном Rusyn, Ruthenian, як активни, живи и окремни (individual) язик. З тим язик Руснацох з Войводини постал ровноправни язик зоз шветовима язиками зоз хторима ше у пракси стретаме скоро каждодньово у живоце и на интернету.
Нєшка ше означує Дзень свидомосци о пинґвинох. Пре пошвидшане вше менше число тих птицох цо нє лєца нєшкайши дзень пошвецени едукованю явносци о пинґвинох.