21. ЯНУАР – На нєшкайши дзень у Шидзе народзена учителька и културно-просвитни роботнїк Вира Гудак.
1861 – Народзени сербски скулптор и академик Сербскей академиї наукох и уметносцох Дьордє Йованович (Нови Сад, 21. януар 1861 – Беоґрад, 23. марец1953), бул єден з сновательох Уметнїцкей школи, з хторей познєйше настала Уметнїцка академия.
1911 – У Монте Карлу отримане перше авто-рели обегованє.
1927 – Народзена Вира Гудак (Шид, 21. януара 1927 – Петроварадин, 28. юлий 2011), учителька и културно-просвитни роботнїк. Вира Гудак, дзивоцке Бесерминї, у Шидзе закончела основну школу, а нїзшу ґимназию у Дервенти, учительску школу у Сараєве и у Осиєку. Робела як учителька у Петровцох. У КПД „Яким Гарди” у Петровцох була длугорочни секретар и руководителька театралней и танєчней секциї. Зоз приходом до Нового Саду 1972. року, робела як учителька пестованя руского мацеринского язика у основних школох. Анимовала дзеци до секцийох у КУД „Максим Горки”, и иницирала формованє оркестра. Зоз фолклорнима секциями поставела вецей танци, а зоз дзецинску театралну секцию режирала театрални фалати и драмски слички. Робела и зоз Дзецинску секцию Новосадскей сцени АРТ „Дядя”. Сотрудзовала и зоз Драмску програму Радио Нового Саду. Учителька Вира Гудакова жила зоз фамелию у Петроварадинє, дзе и умарла.
1942 – Почала Новосадска рация у Другей шветовей войни, кед мадярске войско зоз вигварку же слово о рациї же би одкрили скритих партизанох ликвидирало, по розположивих податкох, коло 3.800 цивилох: хлопох, жени, дзеци и старих, а по нєподполних податкох було найвецей Сербох и Єврейох, алє и Мадярох, Руснацох и Русиянцох… Комеморация ше у Новим Садзе отримує каждого року на дзень кед почала „рация” у Новим Садзе, на Кею жертвом рациї при памятнїку Фамелия, хтори виробел скулптор Йован Солдатович (1920–2005), а поставени є 1971. року.
