22. ЯНУАР – На нєшкайши дзень у Дюрдьове ше народзел Любомир Рамач Киме, хтори бул директор и на вецей заводи главни и одвичательни редактор новинох „Руске слово”.
1896 – Народзени сербски маляр Сава Шуманович (Винковци, 22. януар 1896 – Горватска Митровица, 30. авґуст 1942). Одроснул у Шидзе, а до Ґимназиї ходзел у Земуну, дзе мал и годзини малярства при учительови Исидорови Юнґови. Потим Сава Шуманович одходзи до Паризу, єден час твори и у Заґребе и 1930. року ше враца до Шиду кед малює пейзажи и акти. Саву Шумановича загарештовали усташе и штреляни є 30. августа 1942. у нєшкайшей Сримскей Митровици. Його роботи чува ше у Ґалериї малюнкох „Сава Шуманович” у Шидзе. Ґалерия настала 1952. року кед уметнїкова мац Персида Шуманович (1875–1968) подаровала городу Шиду 417 його твори и фамелийну хижу. Сава Шуманович намальовал пейц малюнки на хторих му инспирация були дзивки Рускинї хтори робели у його обисцу. У Ґалериї и нам позната його слика „Рускиня у народним облєчиве” (1935).
1913 – Народзени Ириней Тимкo (Коцур, 22. януар 1913 – Нови Сад, 8. септембер 1987), хорски дириґент и композитор, музични сотруднїк. Ириней Тимкo ше народзел у Коцуре, як треци од штирох братох и шицки штирме були священїки. Основну школу закончел у Коцуре, а ґимназию у Травнику. Филозофию и теолоґию закончел у Риме. За священїка бул пошвецени у Коцуре 2. юния 1938. року, бул капелан у Прняворе (Босна), а од октобра капелан у Руским Керестуре. Водзел и керестурски мишани хор, а єден час (1942–1944) и режирал театрални фалати керестурским дилетантом, а водзел и дописовательство ужгородских новинох „Неділя“, у котрих єден бок бул друковани на язику бачванских Руснацох. Концом пейдзешатих рокох Ириней Тимкo бул у канцелариї владичества у Крижевцох и там основал и водзел мишани хор и видал зборнїк церковних композицийох за мишани хор. Як над’звичайно образовани чловек, ерудит, цали свой творчи потенциял и роботну енерґию пошвецел музики. Спочатку робел як инспициєнт Опери Сербского народного театра у Новим Садзе, активно ше уключел до тедишнього новосадского КУД „Максим Горки“, дзе основал и мишани хор зоз котрим руководзел по конєц свойого живота. Од 1969. року познати хорски дириґент и композитор Ириней Тимко бул на длужносци редактора рускей народней музики у Радио Новим Садзе. Ту вон розписує аранжмани за руски народни шпиванки, дириґує зоз тамбуровим и народним оркестром под час знїманя руских шпиванкох на маґнетофонску пантлїку и пише замерковани етномузиколоґийни тексти до руских музичних емисийох. Бул нєзаменлїви у креированю репертоара новостворених композицийох текстох, виведзених на Фестивалу „Червена ружа“. Поховани є на Новим теметове у Новим Садзе.
1941 – Народзени Любомир Рамач (Дюрдьов, 22. януар 1941 – Нови Сад, 29. април 2005), новинар и публицист, бул директор и на вецей заводи главни и одвичательни редактор новинох „Руске слово”. Основну школу Любомир Рамач закончел у Дюрдьове а Стредню економску школу у Новим Садзе, Економски факултет у Суботици, а од 1. авґуста 1966. року почал робиц як новинар у НВУ „Руске слово”. У новинох робел шицки новинарски роботи, бул вонкашнї сотруднїк, потим новинар-сотруднїк, новинар-редактор политичней рубрики, заменїк главного и одвичательного редактора, вец главни и одвичательни редактор на вецей заводи (1974–1983, 1987–1993. и 2000–2005) и директор (1979–1987). До пензиї пошол 31. марца 2005. року. Любомир Рамач умар 29. априла 2005. року у Новим Садзе, поховани є у Дюрдьове.
1942 – У Руским Керестуре народзени Янко Гудак (Руски Керестур, 22. януар 1942 –Руски Керестур, 28. марец 2020), дипломовани инженєр польопривреди и вецейрочни ґлумец-аматер у Руским народним театре „Петро Ризнич Дядя”. Янко Гудак основну школу закончел у Керестуре, Стредню польопривредну школу у Зомборе, а Польопривредни факултет закончел у Новим Садзе. Робел у Землєдїлскей задруґи „Русинˮ, а од 1969. року у Польопривредним комбинату „Перши майˮ у Руским Керестуре, аж по одход до пензиї. Зоз театралну дїялносцу ше почал занїмац 1960. року. Окреме ше анґажовал у рамикох Керестурскей сцени Аматерского руского театра „Дядяˮ, познєйше у Руским народним театре „Петро Ризнич Дядяˮ у Руским Керестуре и витворел 14 улоги. Янко Гудак поховани на керестурским теметове.