24. ЯНУАР – На нєшкайши дзень народзени др Федор Лабош, автор Историї Русинох Бачкей, Сриму и Славониї 1745–1918.
1732 – Народзени французки писатель Пєр Оґистен Карон де Бомарше (Париз, 24. януар 1732 – Париз, 18. май 1799). Бул годзинкар, драмски писатель, наставнїк музики, дипломата. Автор є комедийох Севильски байбер и Фиґарова женїдба.
1902 – Народзени др Федор Лабош (Дюрдьов, 24. януар 1902 – Заґреб, 5. новембер 1977), публициста, историоґраф и културни дїяч. Основну школу закончел у Коцуре, дзе му оцец бул священїк. До ґимназиї ходзел у Риєки и у Вельким Бечкереку, а вельку матуру положел у Панчеве. Студиї предлужел на Економско-комерциялней високей школи у Заґребе, дзе и докторовал 1928. року. У Паризу, слухал викладаня на познатей Еcole des Hautes Etudes и здобул наслов професора французкого язика. Др Федор Лабош ше занїмал зоз публицистику, писал по руски, а тиж и на других язикох. Бул сотруднїк предвойнових Руских календарох (1921–1941), а по Другей шветовей войни сотрудзовал у Новей думки у Вуковаре. Його История Русинох Бачкей, Сриму и Славониї 1745–1918 вишла постгумно, два роки познєйше, односно 1979. року. Умар 5. новембра 1977. року у Заґребе.
1984 – Представени Мекинтош (Macintosh), перши рахункар зоз ґрафичним хасновательним окруженьом.
1994 – У Союзней Републики Югославиї уведзени нови динар (наволани и супер динар, лєбо Аврамов динар). Тедишнї ґувернер Народней банки Драґослав Аврамович уведол нови динар, зоз чим застановена гиперинфлация, и теди єден динар вредзел кельо и єдна нємецка марка.