26. АПРИЛ – На нєшкайши дзень народзел ше музични педаґоґ и композитор Яким Сивч.
1935 – Народзел ше музични педаґоґ и композитор Яким Сивч (Руски Керестур, 26. април 1935 – Руски Керестур, 2. децембер 1987), автор текста и композициї шпиванки Ружи, червени ружи (настала 1969. року и преглашена за гимну Фестивала Червена ружа). Основну школу и ґимназию закончел у Руским Керестуре, Оджаку и Бачкей Паланки. Уписал ше на студиї права на Правним факултету у Беоґрадзе. Медзитим, його преокупация була музика. У керестурским Доме култури як шеф рахунководства почал робиц 1962. року. Бул єден з орґанизаторох и сновательох фестивала Червена ружа. Пририхтал за наступ на сцени шицких шпивачох на першей Червеней ружи. Позарядово закончел стредню музичну школу у Новим Садзе и уписал ше на музични напрям Висшей педаґоґийней школи у Сараєве, дзе дипломовал 1969. року и почал робиц як наставнїк музичного образованя у Основней школи „Петро Кузмяк” у Руским Керестуре. Пензионовал ше 1984. року, упокоєл ше 2. децембра 1987. року. Поховани є у Руским Керестуре.
1938 – Народзел ше историчар и политоколоґ професор доктор Иван Поп (Страбичов, Чехословацка, 26. април 1938 – Хеб, Ческа, 14. септембер 2023). Студирал историю на Ужгородским универзитету. У периодзе од 1989–1992. рок бул главни одвичательни редактор славистичного часопису Славяноведениє. Бул и руководитель Институту карпатолоґиї и вєдно з другима почал робиц на тим же би ше припознало самосвойносц Русинох и автономия Подкарпатскей руси на України. Зоз фамелию ше 1994. року преселєл до Хебу у Ческей Републики. Руска матка 2021. року преложела и видала йоґо кнїжку Мала история Руснацох, хтору у ориґиналу видало Здруженє интелиґенциї Русинох Словацкей.
1986 – Експлодирал реактор число 4 нуклеарней централи у Чернобилю у України. Радиоактивни хмари прекрили скоро цалу Европу, а пошлїдки тей нуклеарней катастрофи ище вше ше випитує. Нуклеарна централа тирвацо заварта 15. децембра 2000. року. Зєдинєни нациї тоту експлозию преглашели за найвекшу еколоґийну катастрофу у историї чловечества.
Нєшка Шветови дзень интелектуалней власносци.
