26. ФЕБРУАР – На нєшкайши дзень народзена Мария Моснак.
1802 – Народзени писатель Виктор Иґо (Безансон, Французка 26. фебруар 1802 – Париз, 22. май 1885), писал писнї романи и драми. Активно участвовал у политичним живоце Французкей, родоначальнїк французкого реализма.
1933 – Народзени Владимир Мученски (26. фебруар 1933 – 13. юний 2022), длугорочни секретар у ОШ Петро Кузмяк, инструменталист на гармоники.
1935 – Физичар Роберт Вотсон Ват першираз явно демонстровал апарат хтори наволани радар, за одкриванє и одредзованє положеня з помоцу радио-габох.
1946 – Народзена перша професийна спикерка у Рускей редакциї Радио Нового Саду и на ТВ Нови Сад Мария Моснак, дзивоцке Вадаски (Коцур, 26. фебруар 1946 – Ветерник, 30. май 2022). Основну школу закончела у Коцуре, а ґимназию у Вербаше. По законченю штреднєй школи уписала студиї на Висшей Управней школи у Новим Садзе. У Рускей редакциї РНС почала робиц 1967. року, цали роботни вик препровадзела пред микрофоном на радию, а була и перша телевизийна спикерка на рускей програми ТВНС. Окрем спикерских роботох, Мария робела и як новинарка и прекладателька. До пензиї пошла у фебруаре 2001. року, упокоєла ше у Ветернику 30. мая 2022. року, а похована є на городским теметове у Новим Садзе.
1965 – Народзени Боґдан Ґамбаль (Полковице, Польска, 26. фебруар 1965 – Ґорлице, Польска, 2. юлий 2020). Закончел етноґрафию на Яґелонским универзитету у Кракове. Бул русински дїяч, снователь и редактор першого лемкивского интернет радия – ЛЕМ.фм, а бул и на чолє Здруженя Руска Бурса.
2002 – Скупштина Сербиї прилапела вименки Виновного закона зоз хторима утаргнута смертельна кара.