27. ЯНУАР – На нєшкайши дзень народзени Волфґанґ Амадеус Моцарт и владика др Гавриїл Букатко, а у школох ше означує школска слава Святи Сава.
1756 – Народзени композитор и пияниста Волфґанґ Амадеус Моцарт (Јоханес Крисостомус Волфгангус Теофилус Моцарт; Салцбурґ, 27. януар 1756 – Беч, 5. децембер 1791), єден з найвекших композиторох класичней музики. Написал вецей як 600 дїла, уключуюци опери, симфониї, концерти за клавир и други инструменти, смиково квартети, кантати и други.
1913 – Народзени др Гавриїл Букатко, (Долнї Андриєвци, Славония, 27. януар 1913 – Вербас, 19. октобeр 1981), беоґрадски надбискуп и крижевски владика. Др Гавриїл Букатко основну школу закончел у родним месце а ґимназию у Славонским Броду, вельку матуру закончел у Францисканскей ґимназиї у месце Високо. Филозофию и теолоґию студирал и Риме, дзе и докторовал 1940. року. За священїка бул пошвецени у Риме 1939. року. Службовал у Руским Керестуре 1940. року, у маю 1941. року постал канцелар, а од фебруара 1942. року секретар тедишнього администратора Крижевского владичества Янка Шимрака и од авґуста 1942. секретар Владичества. За владику є пошвецени 1952. року у Заґребе. Папа Иван XXIII го поставел за члена предконцилскей комисиї за лаички апостолат, а 1960. року за резиденциялного владику Крижевского владичества. Од 1950. др Гавриїл Букатко бул секретар Владических конференцийох Югославиї, а од 1964. року превжал водзенє Беоґрадского римокатолїцкого надвладичества и Банатскей апостолскей администратури, при чим и далєй водзел Крижевске владичество, алє ше преселєл до Беоґраду. Владика Гавриїл Букатко преложел евангелию на руски язик. Пензионовал ше 1980. року, пре слабе здравє, з Беоґраду ше приселєл до Керестура. Умар 19. октобра 1981. року у болнїци у Вербаше, поховани є 22. октобра 1981. року у Церкви святого отца Миколая у Руским Керестуре.
У Сербиї ше означує школска слава Святи Сава, як памятка на св. Саву першого сербского архиепископа. Як школска слава 27. януар ше означує од 1840. року, после Другей шветовей войни у школох ше престало означовац школску славу, а од 1990. року ше ознова школска слава означує у школох у Сербиї. Школи маю роботни, алє нєнаставни дзень, а звичайно ше у школох орґанизує рижни програми, представи, академиї.
1995 – У Братислави урядово кодификовани и припознати Карпаторусински литературни язик у Словацкей. У рамикох кодификациї обявени: правописни правила, ортоґрафски словнїк, словнїк линґвистичней терминолоґиї и буквар и читанка за основни школи.
Нєшка Медзинародни дзень здогадованя на жертви Голокауста. На тот дзень 1945. року Червена армия ошлєбодзела концентрацийни лаґер Аушвиц. Дзень установени зоз Резолуцию 60/7 Ґенералней скупштини Зєдинєних нацийох, хтора принєшена 1. новембра 2005. року.