31. ДЕЦЕМБЕР – На нєшкайши дзень народзени музичар Ивица Чукляш.
1781 – У ЗАД отворена перша банка.
1879 – Америцки пренаходзач Томас Алва Едисон у Менло Парку у Ню Джерсию, першираз явно демонстровал свою електричну грушку.
1934 – Народзел ше професийни музичар, дириґент, композитор забавних мелодийох Иван Чукляш (Бєловар, 31. децембер 1934 – Нови Сад, 26. септембер 2002). Основну школу Ивица Чукляш закончел у Бєловаре, а стредню музичну у Сушаку. Почал робиц у воєним оркестру перше у Суботици, а од 1958. року у Новосадским ґарнизону. Робел як солиста на гармоники у Радио Новим Садзе, а потим у Новосадскей опери Сербского народного театра, дзе грал як тимпанист. Бул член оркестру у КУД Максим Горки, а уж 1970. року послал композициї забавних мелодийох на Червену ружу. Основал Хлопску шпивацку ґрупу Новосадски товарише, хтора исновала од 1980. по 1995. рок, зоз краткима прервами. Иван Чукляш умар 26. септембра, поховани є на Новим теметове у Новим Садзе.
1994 – Пущена до роботи перша мрежа мобилней телефониї у Сербиї, Мобтел.
Нєшка вечар ше дочекує Нови рок. По античних писательох, преславйованє Нового року настало зоз преславйованя народзеня Слунка, а гашенє и палєнє шветла на пол ноци здогадує на звичай старих Єгиптянох на пол ноци наявиц приход шветлосци. Стари Персиянци го преславйовали даруюци єдни другим вайца, а Римянє даруюци драгоцини дарунки. Як початок Нового року 1. януар ше почало преславйовац у чаше владаня римского державнїка Юлия Цезара, а познєйше тото прилапели и Християнє.