4. ДЕЦЕМБЕР – На нєшкайши дзень вишло перше число Руских новинох.
1791 – Вишло перше число британского Обзервера (The Observer), найстарших тижньових новинох на швеце.
1924 – Вишло перше число тижньових новинох на руским язику Руски новини. Перши числа Руских новинох друковани у друкарнї Даничич Д. Д. а потим у друкарнї Натошевич С. Дїсаловича у Новим Садзе дзе було и шедзиско Редакциї, на чиїм чолє бул тедишнї новосадски грекокатолїцки парох Юрий Павич.
1933 – Народзел ше културни дїяч, ґлумец, режисер Владимир Дудаш (Руски Керестур, 4. децембер 1933 – Петроварадин, 3. марец 2021). У Керестуре закончел основну школу и 4 класи ґимназиї з малу матуру. Стредню зубарску школу Владимир Дудаш закончел у Новим Садзе, а як зуботехнїчар робел у Сенти, у Оджаку, Кули и у Руским Керестуре. У руским театралним живоце бул присутни и як член рижних руководзацих целох: 22 роки бул директор Аматерского руского театра Дядя сцени у Руским Керестуре и Новим Садзе, бул активни член руководзацих целох Дружтва за руски язик, литературу и културу, и активни член Рускей матки. Владимир Дудаш поховани на теметове у Руским Керестуре.
1970 – У Новим Садзе основане Дружтво за руски язик, литературу и културу, дружтвена, нєвладова, нєстранкова и културно-просвитна орґанизация хтора ше занїма зоз пестованьом язичного и литературного скарбу руского народу у Сербиї. Перши пресдидатель бул Микола М. Кочиш. Од 1975. року Дружтво видава рочнїк Творчосц, хторому 1987. року мено пременєне на Зборнїк роботох Studia Ruthenica.
2005 – Першираз отримана Манифестация Дравски габи у Осиєку, хтору ше отримує першей соботи у децембре. Манифестация задумана як стретнуце хорох и шпивацких групох Руснацох.
Нєшка Дзень воєних ветеранох у Републики Сербиї. Дзень ше означує як здогадованє на датум кед 1912. року подписане примирє у Першей балканскей войни и кед вояци Войска Кральовини Сербиї достали званє стари борец, лєбо воєни ветеран.